Na december 2023, Parlamento di Aruba unanimamente a hancra e normanan presupuestario nobo pa Aruba den e ley di supervicion financiero LAft. Ta trata di tres norma cu ta codifica den artikel 14 di e Ley di LAft. Presupuesto 2024 ta bira e prome presupuesto cu lo wordo midi cu e normanan nobo aki pa Colegio di Supervision Financiero, CAft.
Tres norma
Den un comunicado di prensa, minister di Finanzas a informa cu e prome norma ta rekeri pa Aruba tin un surplus di por lo menos 1% di GDP tur aña. E di dos norma ta stipula cu e gastonan di personal no por sobrepasa e 10% di GDP anual, cual ta un meta cu mester keda logra pa aña 2027. E di tres norma ta encera cu e porcentahe di debe di Pais Aruba relaciona na nos GDP, e quota di debe, mester yega na 50% na aña 2040.
Presupuesto 2024
E tres norma nobo lo ser usa pa CAft pa prome bes pa haya supervisa e ehecucion di Presupuesto 2024. Por menciona cu e Presupuesto di Pais Aruba pa aña 2024 ta conta cu un surplus di 2,2% conforme e ultimo Cambio di Presupuesto 2024, segun e comunicado. E gastonan di personal ta na 484 miyon florin cual ta 8% di nos GDP. Pa locual ta trata e debe di Aruba, esaki ta bahando rapidamente y ta na 73% di nos GDP den aña 2024, y esaki ta conforme e caminda cu mester cana pa yega na 50% di nos GDP na aña 2040.
