Dialuna ultimo den oranan di atardi, minister di Finanzas, Xiomara Maduro hunto cu directornan di Departamento di Impuesto, Luenne Gomes-Pietersz y Departamento di Aduana, Ricky Croes tabata un biaha mas den un conferencia di prensa despues cu diahuebs ultimo a brinda informacion riba e introduccion di BBO, pero algun duda y confusion a keda den comunidad.

Por a tuma nota cu desde diahuebs ultimo cu a bin cu e anuncio, tin persona cu tin pregunta y tin tambe confusion y p’esey nan a haya cu ta importante pa “informacion corecto” yega na cada persona.

Diabierna ultimo e concepto di Ley di BBO na frontera a yega parlamento pa su tratamento, awor ta keda pa parlamento formula e preguntanan y manda esaki pa gobierno back.

E mandatario a splica cu BBO na frontera ta habri caminda pa un introduccion di BTW na Aruba y cu gobierno a traha pa 2 aña largo pa Aruba por bay over riba e sistema di BTW manera IMF a conseha pa largo tempo, pero BBO for di su introduccion na 2007 a conoce algun cambio pero e critica semper a bin dilanti den e parti di BBO cu ta acumulativo aunke ta e impuesto di mas simpel den su categoria.

Nan a traha den esaki pero aña pasa na ultimo momento, no a logra trata e Ley di BTW, debi cu a bin un situacion di inflacion halto rond di mundo cu a afecta Aruba tambe y politica na Aruba a dicidi cu no por tuma e risico pa introduci un cambio fiscal grandi na e momento eynan, ya cu introduccion di BTW lo a trece cune un efecto di inflacion di 5.3% pa 9.9%.

Debi na esaki e BTW no por a tuma luga manera minister Maduro a señala, sinembargo Aruba tin un realidad financiero cu ta exigi accion, na unda cu prome cu e pandemia caba, Aruba tabata tin un mega debe y durante di e pandemia Aruba mester a traha un debe cu Hulanda cu ta pone un presion grandi riba e finanzas publico di pais.

E debe di pandemia tabata necesario pa asina Aruba por a surpasa e pandemia, pa yuda pueblo y yuda comercio y awe economia ta draai bon, unda cu a ‘bounce forward’ y esaki ta debi na e inyeccion grandi di fondonan den economia di Aruba, awo Hulanda ta exigi pa Aruba paga e debe.

Gobierno a informa caba cu Hulanda no ta bay duna kwijtschelding y tampoco refinancia e debe na 0%, “nos mester tene cuenta tambe cu e condicionnan pa fia riba mercado mundial. Esaki tur ta pone cu nos tin retonan financiero a termino corto, mediano y largo plazo pa trata cune.”

En bista di esaki, gobierno a dicidi pa no laga e trabou riba BTW bay perdi y traha riba locual ta e critica cu a bin dilanti pa asina traha caminda pa BTW por introduci mas dilanti.

Minister Maduro a indica cu gobierno ta tene consideracion cu tur e critica cu a stroba introduccion di BTW y ta atende cu cada un pa asina habri caminda pa introduci BTW den e tempo dilanti, e critica ta trata riba base amplio cu mester cobra un solo tarifa di BTW en bes di tres tarifa, tarifa halto mester ta mas abou cu 14%, mehora cumplimento cu ley (compliance) prome y atende cu funcionamento di Departamento di Impuesto paso ta duda cu DIMP por atende cu un sistema mas complica di BTW.

Na e momento eynan for di e mundo comercial mes a bin sugerencia pa tanten, hisa BBO cu 1% y introduci cobransa na frontera pa asina crea un ‘level playing field’ na Aruba, na unda tur cu ta participa den economia na Aruba ta contribui na caha di Gobierno.

“Esaki ta e motibo di pakico a introduci e BBO na frontera tambe pa por crea e level playing field akinan pa productonan comercial pero tambe pa promove e compliance cu tin mester di cumplimento.”

Mester destaca cu BBO na frontera tambe tin su efecto di inflacion cu ta premira na 1,4% cual lo ta hopi menos cu 5.3% of 9.9% cu e introduccion di BTW lo a trece cune, tambe pa alivia e peso fiscal ora di importa, a bin cu algun simplificacion den e sistema di invoerrechten pa crea eficiencia y ta compensa, “tur esaki ta haci pa prepara Aruba pa por bay over na un sistema di BTW cu ta un recomendacion y ayudo di IMF,” el a bisa.

A scoge pa sigui cu BBO cu ta un sistema simpel y laga e BBO na frontera traha pa algun aña pa asina comercio, pueblo, DIMP y Aduana custuma cu e cambio aki cu ta mimica e sistema di un BTW cu ta traha cu derecho di restitucion di e impuesto cu ta paga na frontera, algo nobo pa Aruba “pero esaki ta antesala pa bay over na e sistema di BTW pasobra ainda tabatin discusion cu nos tur tabata sa cu un BTW tabata un miho belasting pa Aruba, pero na momento di introduccion nos a mira cu debi na inflacion, nos no a bay door mas cune.”

E informacion fiscal ta bay yuda pa haci calculacion nobo pa e sistema di tarifa di e BTW y ta duna espacio pa BTW por introduci sin mucho resistencia.

E simplificacion di e sistema di invoerrechten di 12 tarifa pa 6 tarifa ta bay brinda eficiencia y algun compensacion cune.

Debi na varios pregunta cu a keda haci, nan a pasa riba algun detayenan na unda minister Maduro a sigura cu gobierno a bin ta traha riba e stabilidad financiero di Aruba den cual a traha no solamente riba entrada pa pais Aruba, pero tambe a baha gasto di gobernacion, loke segun el a sigura, esey por verifica den e diferente rapportnan local y internacional.

E control cu ta bay haci di pago di BBO na frontera ta bay haci door di departamento di Aduana, na momento cu e persona ta yena a formulario automatisa di ASYCUDA na momento di indica kico ta bay importa, e sistema mes ta indica cuanto tin cu paga di BBO y e sistema mes ta bay notifica departamento di Impuesto cuanto BBO e persona a paga na frontera. Esey ta nifica cu no mester haci papelnan ni na Aduana ni na departamento di Impuesto lo cual tampoco ta bay causa gastonan administrativo, manera e mandatario a señala.

Personanan y negoshinan mester paga e BBO, esnan cu ta bestel productonan online na unda na Aruba diferente persona ta trece mercancia pa bende nan riba rednan social como por ehemplo riba Facebook di Vraag & Aanbod unda antes tabata paga solamente invoerrechten pero awor como persona particular tambe tin cu paga e BBO na frontera “pasobra tur hende ta bay coopera cu caha di gobierno, na largo tempo nos a tende cu no tin level playing field hendenan ta drenta cu mercancia y bende nan riba Vraag & Aanbod, camber na cas of band’i caminda y nan no ta paga nada, companianan estableci si tin cu paga e delaster cos, aworaki nos tur ta contribui na caha di gobierno pa asina nos tur por ricibi e servicionan cu como persona, comercio of comunidad nos tur kier ricibi for di un gobierno,” el a bisa.

Tocante otro dudanan cu a trece dilanti, a sigura cu fruta y berdura ta paga 7% di BBO na frontera pero por deduci for di volumen di benta, productonan pa benta tin derecho di deduccion, productonan pa uso di operacion di negoshi por deduci di e ganashi y entrada pasahero cu producto via aeropuerto tin vrijstelling di 400 florin di invoerrechten y BBO.

Pa preguntanan y/of dudanan e mandatario a laga un number di telefon pa por tuma contacto cune na 592.8200.