Segun minister di Enseñansa Gerlien Croes DPS no tin un formatieplan aproba

Diabierna ultimo Parlamento di Aruba a trata, y aproba di forma unanime, presupuesto nacional 2025. Minister di Relacionnan di Reino, Educacion, Hubentud, Innovacion y Deporte, a contesta algun pregunta relaciona cu e cartera di enseñansa.

Prome cu minister Croes a contesta pregunta cu el a ricibi di miembro di fraccion AVP, Otami Tomasia, el a remarca cu huramentacion di Gabinete AVP-FUTURO un etapa nobo a cuminsa pa Aruba. “Nos ta masha contento cu nos tin e oportunidad awe pa nos por presenta, den un forma asina acelera despues cu a huramenta awe mainta, tanto e pensamento y ideanan di locual nos a bin ta papia di dje caba como Gabinete entrante,” el a indica.

E mandatario a menciona cu durante e reunion el a scucha diferente pregunta, pensamento y ideanan cu a bin dilanti cu ta haci cu e ta cuestiona dicon esakinan no a pasa caba. “Pero manera nos ta bisa nos mester keda cu e inspiracion y positivismo y e gabinete aki t’ey awe pa ehecuta tur loke cu no a ser ehecuta den e ultimo añanan,” el a agrega.

Bisando esaki, el a indica cu, cu e liña cu e gabinete aki ta carga di inverti den comunidad, di duna back na comunidad, pero tambe alabes inverti den e formacion di e hendenan cu ta e personanan cu mester carga e desaroyo di e pais aki no solamente economicamente pero den tur sentido, ta e liña cu nan ta presenta na comunidad di Aruba.

Minister Croes a tuma e oportunidad pa duna informacion y a splica cu prome cu e gabinete nobo a haci su entrada, e preparacion pa e trabou tabata tuma luga pa hopi tempo caba. El a sigui splica cu e puntonan cu por wak den e plan di gobernacion ta puntonan cu a ser carga pa hopi tempo caba, y ta cosnan cu como gobierno nobo nan ta reconoce. “Pa e motibo ey nos ta presente awe, pa e motibo ey dia 6 di december pueblo di Aruba a vota diferente pasobra nan kier wak cosnan diferente pasa,” el a remarca.

E mandatario a indica cu den e cartera di educacion y deporte tin hopi necesidad y tabatin un fase transitorio. El a recorda, manera cu tur hende sa, e ultimo minister cu a carga e cartera aki e ultimo lunanan no tabata minister mas. El a enfatisa cu tin hopi pa atende cune den e area aki, y tin hopi necesidad, den e area aki, cual e referi na dje como e cuna di e pais.

“Akinan nos ta inverti y crea e ciudadanonan di e pais aki, aki nos hoben y muchanan cu tin cu carga e futuro di Aruba ta en espera di sa kico nos ta bay inverti den nan pa nan por biba tambe den e futuro cu Aruba ya caba ta bibando aden. Mundo ta desaroya di un forma asina acelera. Nos como isla manera cu nos ta bende nos mes, turistico , innovativo, no por keda atras pa forma nos hendenan debido pa yuda nos carga e pais aki,” el a subraya.

Bisando esey, el señala, cu esnan cu ta yuda carga e veld aki tambe tin un necesidad inmenso y debidamente a haya pregunta ariba locual ta e tema salarial di e docentenan na Aruba.

Minister Croes a splica cu pa hopi aña discusionnan a ser hiba y cierto momento den añanan atras te cu 2017, el a menciona, ainda tabatin proposicion riba mesa pa loke ta ‘functiehuis’y despues pa un tempo largo no tabatin mucho mas cu a ser dialoga riba e topico aki

E mandatario a indica cu prome cu a ricibi e overdracht for di e minister saliente, hunto cu Sr. Eman, den capacidad di formador a sinta cu gran parti di e veld di educacion y a base di esey a bin ta prepara caba, cu ta haci cu aworaki ta yega e momento pa sinta y cuminsa ehecuta.

El a surgi splica cu a base di eseynan a ricibi documentonan na unda nan tabata informa riba rondanan consultativo cu tabatin, y conseho y rapportnan cu a ser manda pa DRH riba un pensamento y proposicion pa cambio salarial pa nos docentenan na Aruba.

El a indica cu tin un adviescomisie, ‘restructuracion salarial di maestronan’, cu a prepara un conseho, cual a bay DRH, pero ainda no tabatin un contesta riba esaki.

El a enfatisa cu un punto di accion importante pa su persona na e momento aki ta wak kico ta e situacion riba e consehonan pidi riba e advies aki cu ta trece cuater opcion di idea y pensamento di con por compensa e docentenan na Aruba cu pa añas ta biba cu un structura salarial cu nunca a ser cambia.

“Mi ta kere den aña 2025 unda cu inversion den nos hendenan ta cardinal pa e pais aki keda opera, no por ta asina cu nos ta descarta e importancia di inverti den e parti mas importante na Aruba, cu ta crea e hendenan cu mester carga e pais aki. Cada cambio, cada pensamento ta exigi di nos como dirigente di e pais aki pa tambe tin un apoyo pa tambe esnan cu ta bay ser afecta positivamente cu un cambio asina tambe tin su pensamento cu ta ser scucha,” el a enfatisa.

Minister Croes tambe a ricibi pregunta riba locual ta Dienst Publieke Scholen (DPS) cu tin necesidadnan grandi pa loke ta trata personal. El a indica cu e departamento aki no tin ningun formatieplan mes aproba, locual ta haci cu gobierno mester bay cana e trayecto pa esaki.

“Locual cu ta bo dienst di mas importante cu mester carga locual ta e direccion di tur bo scolnan publico na Aruba no tin hende pa traha, no tin un formatieplan, no tin lo necesario ni e mision ni vision pa yuda y asisti, cual ta e dienst di mas importante, e motor cu tin cu sostene e minister e momento aki no ta funcionando, bo ta haya automaticamente cu no tin desaroyo positivo den e veld manera mester ta.

El a remarca cu mester traha di biaha riba crea un formatieplan, aproba esaki y busca tambe esnan cu por yena e vacaturanan na DPS, pero prome cu tur esaki, el a subraya, mester defini e rol, e mision y vision cu cada departamento mester carga pa optimalisa con e areanan aki ta funciona.

“Nos no por yega hisa benta y tuma decision y despues nos ta wak si e ta funciona si of no. Nos tin cu cuminsa traha structuralmente pa Aruba riba tur area. Nos tin cu empodera departamentonan cu ta cay bou di e ministerio aki y nos tin cu cuminsa wak desaroyo pa cu esaki,” el a menciona.