Mediante un conferencia di prensa, minister di Enseñansa y Deporte, Endy Croes a informa cu College van Curatoren (CvC) ta bay haci un investigacion pa haya sa kico ta sucediendo na Universidad di Aruba ya cu segun fuentenan, tin un situacion delicado pa posible fraude riba e CV di rector Viola Heutger.

Manera Bon Dia Aruba a publica den su edicion di dia 12 di juli cu e headline “Situacion delicado na Universidad di Aruba: Rector Heutger por a comete posibel fraude riba su CV” redactor a asisti na un conferencia di prensa di minister Croes pa puntra si e caso aki ta di su conocemento.

Minister a contesta cu e no tabata na altura di e acusacionnan contra Heutger, el a sigura cu el a lesa e articulo y mesora a comunica cu College van Curatoren den cual tin miembronan hopi respeta den comunidad, manera el a sigura, nan a keda di haci un trabou di investigacion, “esaki ta algo cu prensa a skirbi, nan lo haci un trabou y bin back cerca mi, pero no cu ma sinti, laga nos pone cautelosamente, un nerviosismo of algo den un direccion cu lo no ta, mi kier duna un tiki tempo na College van Curatoren cu nan lo atende y nan lo bin prome cu fin di juli back pa por clarifica esaki,” el a expresa.

Un bes cu nan ta asina leu cu informacion di e investigacion segun minister a enfatisa, nan mes lo comunica cu prensa pa trece claridad den e caso aki.

Fuentenan a indica cu algun hende na Universidad di Aruba tin miedo pa e informacion sali den media pa e atencion no causa cu Heutger ta perde e trabao na Universidad di Salzburg y ademas hopi ta hayando intimidacion tambe.

Den esaki, minister Croes ta considera cu e no por duna un reaccion si tin algun hecho concreto pero via College van Curatoren, minister mes a sigura cu e no a sinti cu tin un inkietud den e direccion aki pero si mester duna espacio pa nan haci nan investigacion y na su debido tempo minister of nan lo por bin dilanti.

Segun e fuente anonimo, na momento cu Heutger a ser nomina pa e funcion, su meta tabata pa usa Universidad di Aruba como un trampolin pa yega na un otro funcion. El a sigui indica cu Deloitte, cu tabata encarga cu e proceso di reclutamento y seleccion, no a haci un background check y e ora mester a laga e departamento di HR di Universidad di Aruba encarga di e tarea aki, pero esaki no a sucede.

E fuente a sigui indica cu tur decaan di Universidad di Aruba ta al tanto di e situacion y tin hopi tension pa motibo cu mayoria ta contra di loke ta pasando.

E fuente anonimo a señala cu no tin union entre e miembronan di College van Curatoren (CvC) di Universidad di Aruba ariba e asunto aki y hasta algun miembro ta apoya Heutger. “E cos ta cu CvC ta un poco dividi pa loke ta Heutger y nan no ta riba un liña y for di CvC mes algun kier pone mas presion riba CvC mes y tambe Heutger,” el a bisa.

Segun e fuente studiantenan mes no tabata na altura di e situacion cu ta pasando na Universidad di Aruba. Tristo tambe ta cu e studentenraad no ta activo y Universidad di Aruba no tin un sindicato ariba cual nan por apoya nan mes pa defende nan mes y e institucion.

El a resalta tambe cu un miembro di CvC en particular ta apoya Heutger cu wowo cera y hopi tin miedo di e miembro aki.

Universidad di Aruba no a realisa investigacion profundo ariba e situacion aki y ainda tin un signo di interogacion sin mucho claridad ni confirmacion ariba e caso.

Pa loke ta trata e reportahe di e medio local di Austria, esaki ta indica cu Huetger no tabata ni ta un investigador na e Academia di Derecho Priva Europeo desde juli di 2013 te cu presente. Segun un experto ta indica no tabatin ningun investigacion realisa den e academia aki, por lo tanto no tabatin tampoco ningun investigador.

E ta resalta cu e descripcion di Heutger ta fraudulento pasobra e Academia di Derecho Priva Europeo tabata simplemente un structura di ayudo pa financia un curso di berano den Derecho Priva Europeo. Ademas e website di e academia aki no tin actividad desde 2012.

Otro punto cu nan ta remarca ta cu Heutger no ta, pa mas di 23 aña profesor di e scol di berano di Universidad di Salzburg. E experto ta señala tambe cu e scol di berano tabata y ta un scol di berano di tres pa cuater siman organisa pa e Departamento di derecho priva cu no por otorga un asignatura.

E ta resumi cu na e scol aki un persona no por djis bira profesor, pero como maximo por siña como profesor na banda. Sinembargo Heutger su afirmacion cu e ta profesor di berano desde aña 2000, den cualkier caso, ta un afirmacion falso.

Na juli di aña 2021 Universidad di Aruba a ricibi dr. Viola Heutger como su rector magnificus. Como orador y profesor invita, Heutger tabata afilia na diferente universidad na Hulanda y otro parti di mundo. Como parti di e ‘flying faculty’ durante cual tempo el a aporta na e inicio di facultadnan di ley nobo. Y durante su carera como abogado el a traha como asesor di comitenan legislativo na diferente pais.

Bon Dia Aruba lo keda pendiente riba e caso aki pa asina trece claridad y informacion corecto na comunidad.