Segun Minister di Enseñansa Armando ‘Rudy’ Lampe: ‘Proyecto pa studiante di Aruba tin camber garantisa na Hulanda’

Ayera mainta, Minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece un conferencia di prensa pa duna di conoce detayenan di su ultimo bishita pa Hulanda y Paris, como tambe su asistencia pa e di 40 conferencia general di Unesco.

Tocante su biahe pa Hulanda y Paris, Lampe a informa cu e tabatin un reunion tocante proyecto di bicicleta. A reuni cu wethouder Bruines na Den Haag y el a remarca cu nan tin un cooperacion cu Aruba pa loke ta e proyecto di promove e cultura di bicicleta.

Den e reunion aki, Lampe a expresa cu nan lo kier continua cu e relacion di trabou durante e aña aki. A ricibi bishita di ambtenaar y consultor di Den Haag, cu a entrena maestronan na IPA y tambe el a recorda e dos proyecto piloto na scol di Dakota y na San Nicolas, unda cu e idea ta pa amplia pa mas scol por participa den e proyecto di fiets onderwijs.

Di mesun manera, Lampe a bisa cu loke nan kier ta pa sigui stimula e uzo di bicicleta y na mesun momento conscientisa tur chauffeur di auto pa tuma na cuenta e ciclistanan, pa motibo cu ainda falta e consciencia di parti di e chauffeurnan pa respeta e ciclistanan riba caminda.

Ademas, el a comenta tocante studiantenan cu ta biba na Hulanda. Hopi di nan ta scoge pa studia na Den Haag, pero e prijsnan pa camber a bira casi impagabel na Hulanda. El a afirma cu studiantenan ta haya hopi dificultad pa haya un luga pa biba cu ta accesibel, y pa e motibo aki, el a expresa cu el a papia cu e wethouder den Aruba Huis pa follow up riba esaki. E idea ta si por yega na un cierto acuerdo den futuro, hunto cu apoyo di Aruba, pa garantisa cierto cantidad di camber pa studiantenan Arubiano, un proyecto cu Gobierno a inicia aworaki.

Lampe a informa cu tambe el a tene un reunion cu ministernan di Enseñansa di Hulanda hunto cu di Corsou, cu tabata forma parti di e encuentro anual entre ministernan di Enseñansa den Reino. Di esaki el a afirma cu na aña 2020 e reunion aki lo tuma luga na Aruba mes, na John F. Kennedy Center.

Den e reunion aki, Lampe a bisa cu a keda palabra cu Biblioteca Nacional y cu ta bay wordo conecta cu Biblioteca Real Den Haag, pa asina tin acceso na tur e informacion digital cu tin den e Biblioteca Real.

Otro punto cu tambe a trata den e reunion, tabata e tema di e desafionan cu studiantenan ta haya pa termina nan studio na Hulanda. Lampe a bisa cu kier stimula studiantenan pa keda studia mas tanto posibel na Aruba den cooperacion y esey tabata e parti cu a keda acorda cu institucionnan universitario di Hulanda, loke ta nifica cu fisicamente e studiante no mester bay Hulanda pa studia eynan, sino cu por studia na Hulanda pero fisicamente e ta na Aruba.

“Tin hopi di estudio cu aworaki riba nivel universitario ta wordo ofreci online”, Lampe a manifesta.

Pa loke ta trata Unesco, el a comenta cu Aruba tabata pertenece na e oficina ‘kluster office’ di La Habana, Cuba y nan a tuma e decision di cambia. Awor ta pertenece pa oficina di Kingston, Jamaica, pa motibo cu e otro cinco isla di Caribe Hulandes ta pertenece na Kingston. E punto di agenda cu ta wordo trata ta di interes special, cu ta e tema di enseñansa.

Lampe a comunica tambe cu durante su intervencion, el a trece dilanti cu Aruba a pidi pa Unesco declara e problematica di isla chikito, mirando e cambio climatico como un prioridad global, no ta un asunto regional mas. Cambio climatico ta pone den riesgo e futuro di e islanan aki, mirando cu door di e keintamento global e islanan por disparce bou di awa. P’esey el a pidi y a haci un apelacion hopi fuerte pa Unesco declara e tema aki como un prioridad global riba agenda mundial.

Lampe a declara cu e director general di Unesco den su discurso final a menciona cu e peticion aki a resalta y cu Unesco lo bay traha riba e tema aki.

Pa finalisa, den e discurso di Lampe tambe el a referi cu PEN 2030 (Plan Educacional Nacional 2030) ta uni cu Sustainable Development Goals (SDGs) 2030 cu Unesco y Nacionnan Uni a declara como meta pa humanidad y educacion di Aruba ta core man den man cu SDGs 2030. Ademas kier pone educacion na servicio di desaroyo sostenibel. “Si educacion no ta pa educa nos futuro generacion pa salba nos planeta, e no tin sentido”, Lampe a declara.