Ayera mainta, minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece un conferencia di prensa pa trece dilanti e situacion cu Colegio San Nicolas (CSN) tin aworaki. Ademas Bon Dia Aruba a tuma contacto cu un docente di e scol aki, ken a duna di conoce su banda di e medaya.
Minister Lampe a expresa cu na momento cu el a bira minister di Enseñansa, su ministerio a topa cu hopi situacion na unda placa di pueblo no ta wordo inverti den un manera eficiente y respetuoso, segun el a sigura, den sistema di Enseñansa.
Di esaki, el a menciona cu nan a descubri fraudenan grandi na diferente luganan, como por ehemplo, Enseñansa pa Empleo, cu te ainda ta bao investigacion. Tambe a descubri cu no tabatin control financiero riba e subsidio cu ta duna na directivanan di scol, y pa motibo aki, nan a descubri cu SKOA a tuma decisionnan contra ley cu a causa un daño miyonario na pais Aruba. El a destaca cu aworaki nan ta bezig corigiendo esey.
Pa e motibo aki, nan a anuncia cu ta bay pone scrutinio riba tur directiva di scol, ta bay haya un control financiero, pasobra cu “pueblo di Aruba merece su placa ta wordo respeta”, minister Lampe a specifica.
Pa loke ta trata Colegio San Nicolas, el a informa cu nan a haya un situacion unda cu mester a haci coreccion. “E rapport di inspeccion di Enseñansa di Colegio San Nicolas di november 2020 ta mustra cu tin un problema structural” minister Lampe a sigura.
Igualmente, el a bisa cu e mayoria di maestronan di scol aki ta haci nan best y ta traha duro pa e muchanan por cumpli nan soño den futuro, pero “Colegio San Nicolas a yega na un punto cu e mester di un reset. E rapport ta mustra cu di un manera artificial tabata pone oranan extra pa cierto vaknan pa cierto docentenan, contra loke e ley ta stipula.”
Esaki ta un situacion cu realmente a perhudica e muchanan, segun loke minister a expresa, pa motibo cu ta foutnan cu no por coregi. Loke a sucede den ultimo añanan, tabata artificialmente traha un rooster cu ta faborece cierto vaknan y tabata perhudicando otro vaknan.
Den rapport aki a pone nomber y fam di 16 maestro di CSN cu a actua contra etica profesional y cu a tene atras cifranan di e muchanan pa ‘X’ motibo, entre otro, den e discusion cu nan tabata exigi pago di overtime, cu segun minister Lampe a comenta, no tabata na su luga. “Esey bo no ta haci como docente”, el a bisa.
E rapport ta menciona otro aspectonan cu mester di coreccion y, entre otro, ta menciona con sistematicamente tabata tin klasnan cu poco alumnonan cu loke ta e exigencianan, pero e gastonan si tabata aumenta structuralmente.
P’esey nan a bin cu un maneho pa loke ta trata CSN conforme cu e ley, pa asina aki mustra respet na e muchanan. Lampe a splica cu despues di lesa e rapport aki, si tabata na Hulanda lo mester a tuma medidanan drastico. Tambe el a sigura cu tin algun materianan cu tin escasez di maestronan y p’esey na october nan a ofrece un solucion, unda cu nan ta enfoca riba examen final, pa asina nan por haya via online un solucion nan training.
Di esaki, Lampe a resalta cu no tur studiante tabata log-in den sistema online pa haya les. Na momento cu Lampe a ricibi e rapport di e persona cu tabata responsabel pa esaki, a sigura cu si tabata existi un problema.
“E hermentnan ey no tabata existi y nos a descubri esey na october. Ta p’esey cu nos a bisa CSN cu nos mester cuminsa mas trempan cu e muchanan, pa siña nan pa nan ta independiente den nan estudio, duna nan e habilidad cu nan ta bay tin mester di dje ora nan bay Hulanda”, minister Lampe a resalta.
Ademas, el a informa cu a nombra un management team nobo, cu lo ta vigente pa un aña so, pa asina haci un evaluacion di loke nan ta haci aworaki y kico ta e situacion, pa e ora ey nan por bay na un solucion mas duradero pa CSN.
Despues lo mester haci un otro rapport pa wak con nan ta bay reset CSN. Tambe minister a comenta cu su nomber ta bay cambia pa Colegio Nigel Matthew: “Esaki ta un bon ocasion pa CSN cuminsa di nobo.”
Docentenan di Colegio San Nicolas ta pidi rectificacion di minister
Bon Dia Aruba a tuma contacto cu un di e 16 maestro di CSN cu minister Lampe a menciona cu ta den rapport aki, kende ta Anchelino Vrolijk. El a duna di conoce cu e ta trahando na CSN for di algun aña caba y cu mayoria di maestronan no ta traha overtime. Na momento cu a traha e cantidad di klas y cantidad di docente cu tin, por mira cu no tin suficiente docente.
El a splica cu na momento cu scol a cuminsa cu e sistema online y cu muchanan tabata na cas, nan tabatin nan oranan sin ningun problema. E ora ey a bin un maneho di minister Lampe, den cual a informa cu algun ora no a wordo paga, cu tabatin un cambio den dje. A base di su maneho y basa riba ley a bin un restructuracion y a bin cambionan.
Di e rapport cu minister Lampe ta papia di dje, Vrolijk a señala cu nan como maestronan no a wak esaki ni un dia. “Minister a acusa nos den cierto aspecto di ta corupto. Nos a haya di baña friu awe mainta di parti di nos mesun minister”, Vrolijk a sigura.
Asina mes, el a detaya cu tur ora cu ta traha no ta scol ta firma p’e, sino Financien y na final di dia ta minister ta firma p’e tambe, segun Vrolijk a menciona.
Pa e motibo aki, “nos ta haya straño di con minister ta bin cu acusacionnan di e sorto aki, sin sinta cu nos, sin splica nos y sin wak kico ta pasando”, Vrolijk a expresa.
“Esaki ta un falta di respet pa e tira cosnan asina den nos scochi, cu nos no tin ni arte ni parti den esey.” El a finalisa bisando tambe cu nan ta pidiendo un rectificacion di minister pa duna e declaracion corecto, si esey no sucede awe, nan lo bay den accion.
