Dialuna mainta durante un conferencia di prensa, minister di Energia, Glenbert Croes a anuncia cu diabierna ultimo, Conseho di Minister unanimamente a aproba exploracion di gas den awanan teritorial di Aruba.
Segun un comunicado di gobierno, Armstrong Oil & Gas Inc. di Merca ta esun cu despues di a haci su sondeo den Caribe, finalmente a acerca Aruba pasobra den nan estudio preliminar nan a mira e awanan teritorial di Aruba cu un potencial grandi. Despues di investigacionnan mas dirigi a logra identifica posibel posnan di gas den e lama di Aruba.
Minister Croes a expresa cu e posibilidad di Aruba tin su propio yacimento di gas como fuente di energia ta un soño cu a nace den añanan 80 y cu awor por bira realidad. Despues cu e exploracion di Repsol no tabatin exito, Aruba toch a keda mantene e speransa di tin su mesun gas. Contando cu Armstrong su trayectoria exitoso den exploracion di gas cu casonan di exito manera esun di Alaska y Venezuela, e mandatario ta convenci cu e biaha aki si ta bayi logra e obhetivo.
Tambe, Minister Glenbert Croes a probecha e rueda di prensa pa informa cu diaranson di e siman aki, e compania MPR hunto cu Utilities Aruba, lo duna un conferencia di prensa pa informa e resultado di e evaluacion y investigacion cu nan a haci na ELMAR y e solucion cu mester tuma pa drecha e problema cu coriente.
Consideracion ambiental
Algo cu no a keda menciona den e comunicado di prensa ta e potencial impacto ambiental di exploracion di gas den awa teritorial. Den añanan recien, por nota entre comunidad local un interes cada bes mas grandi pa proteccion di medio ambiente y naturalesa, cu ta impulsando cambio den e manera cu Aruba ta desaroya su teritorio.
A pesar di e potencial beneficio economico cu por bin cu exploracion di gas – si haya gas na final, e riesgo den cual ta pone medio ambiente ta enorme. Segun WWF, “extraccion di depositonan di gas y azeta por resulta den daño duradero pa medio ambiente. Specificamente, exploracion y desaroyo di gas ta causa interupcion di rutanan migratorio, degradacion di habitatnan animal importante, y derame di azeta – cu por ta devastador pa e animal y humanonan cu ta depende riba e ecosistemanan aki.
Entre e consecuencianan negativo cu exploracion di gas por causa, WWF ta resalta contaminacion, zonido den lama, degradacion y destruccion di habitat, y interferencia cu formanan di bida di subsistencia.
Operacionnan di gas ta libera tonnan di contaminante dañino den aire y ta basha kimico peligroso den lama, degradando e awa y are limpi riba cual bestia y hende ta depende pa sobrevivi. Bayena y otro animal marino ta usa zonido pa nabega, haya pareha y cuminda den e awanan hopi biaha scur di ocean. Zonido sismico, manera e air gun usa pa companianan di gas pa explora offshore, por laga e especienan aki sordo. Zonido excesivo den ocean for di boramento y exploracion di gas por causa lesion, confusion y hasta morto di animalnan.
Ademas, e caminda, tuberia y otro facilidadnan construi pa e companianan pa sostene infrastructura por degrada y destrui habitat importante y interferi cu movemento di animalnan migratorio.
