“For di momento cu na december 2019 a bira conoci cu e promer vacunanan di Pfizer y Moderna lo subi mercado, mi a sinti e urgencia pa prepara Aruba y busca mas vacuna posibel”, minister demisionario di Salud, Deporte y Turismo, Dangui Oduber, a bisa den un comunicado di prensa. “E pandemia a haci nos tur hopi daño y na momento e solucion a presenta su mes, ta mi deber y obligacion pa haci uso di e oportunidad aki.”

Segun e comunicado, “for di luna di december 2020 pais Aruba a prepara pa nos por ta cla pa ricibi e vacunanan. Henter un team multidisciplinario cu ta consisti di ministerio di turismo, salud publico y deporte, departamento di publico, BRA, DOW, IVA, VDA, KPA, Douane y Setar a bin ta prepara na e mihor forma posibel pa ora e vacunanan yega nos ta cla pa cuminsa vacuna nos hendenan. Mi tin cu bisa cu un team hopi dinamico a traha riba nos plan di ehecucion y tambe haci tur e preparacionnan pa e bishita di RIVM. RIVM a bishita Aruba pa haci e controlnan y supervision necesario riba nos plannan y tambe evalua esaki. RIVM a yega 25 januari 2021y nan a haya un presentacion amplio di nos strategia di vacunacion, tambe di nos plan di ehecucion y con esaki ta hinca den otro.

“A controla e freezernan hunto cu tur e instalacionnan y henter e cold chain. Tambe a bishita tur e localidadnan caminda e vacunanan lo wordo duna y a check e transporte y seguridad.

“Nos a percura pa Aruba tawata bon prepara pa manera e vacunanan yega nos por a cuminsa di biaha cu e distribucion.

“Mi ta convenci cu e vacuna ta e solucion pa mundo y pa Aruba y hustamente pa esaki mi a haci tur loke ta den mi alcance pa Aruba wordo vacuna. Esaki mi a pone como mi meta personal pa nos por logra hunto den union.

Mi a hiba un campaña hopi agresivo di informa, educa y conscientisa nos comunidad di e importancia di tuma e vacuna. Manera aña a habri na januari 2021 nos a cuminsa cu esaki. Nos a pidi Hulanda hopi vacuna desde december 2020 pasobra nos sa con importante e vacuna ta pa evita mas hende fayece, mas hende wordo hospitalisa y pa nos por progresa. Nos a negosha cu Hulanda firme y cu argumentonan nos por a convence nan pa manda nos mas vacuna. Nos a logra convence Hulanda pa manda mas vacuna pa nos Considerando e cantidad di registracion cu nos tin, E capacidad di duna vacuna cu nos tin, E eficiencia di nos proceso Y tambe e cantidad di hende vacuna.

Nos a haci uso di e Aruba Health app, nos a busca un personal profesional, amabel y servicial. Nos a aumenta nos capacidad pa vacuna pa dia te na 3000 vacuna pa dia y asina nos ta logrando vence e pandemia.

Awe nos ta wak con e cantidad di casonan ta bao di aun averahe di menos di 20 caso nobo pa dia. Nos ta wak cu na hospital tin solamente 3 persona interna den departamento di Covid y 6 den ICU. Nos a percura pa vacuna casi 56.000 persona na Aruba y 70% di nos grandinan riba 60 aña di edad”, Oduber a relata den e comunicado.

“Mi ta sinti asina contento y orguyoso cu Aruba a responde na e yamada pa vacuna y nos ta sintiendo e resultado di esaki. Aruba ta bayendo den bon direccion , casonan ta bahando, cantidad di persona hospitalisa ta bahando, menos hende fayeciendo y nos turismo recuperando. Tur esaki ta danki na e hecho cu mas y mas hende ta vacunando.”