Diaranson anochi a surgi un situacion fastioso na e dum di Parkietenbos despues cu a surgi un candela grandi cu explosion. E minister encarga cu dump, Mike de Meza, ta haya cu e situacion aki no por sigui manera e ta bayendo. Segun e mandatario, Ta buscando un miho solucion pa atende cu desperdicio.
Den pasado a purba bou di diferente Gobierno di yega na un solucion, cual te dia di awe ta mustra di no ta facil. Minister de Meza a opta pa cera e dump pa evita cu cosnan sigui manera ta bayendo. Den pasado no tabatin hopi hende cu tabata preocupa pe situacion pasobra nan tabata contento cu tin dump y ta yega tira tur cos eynan pero awo e luga a satura y e situacion aki no por sigui asina.
Ministerio di Medio Ambiente no por tolera esaki mas y pa basta tempo nan ta trahando pa yega na un solucion real, sostenibel, cual ta un solucion por eherce esaki riba un manera responsabel segun e minister. Despues di e candela di diaranson anochi esaki a pone cu Ministerio di Medio Ambiente lo mester bay acelera e proceso. Minister de Meza a papia cu ministernan Mike Eman y Benny Sevinger y cu mas persona di e comision, unda cu minister de Meza a anuncia cu aki algun siman e dump no lo ta den servicio mas.
Segun e minister ta splica, Ministerio di Medio Ambiente no lo bay uza un proceso tampoco cu ta un “proven technology”, pero lo uza algo, un sistema cu por prueba cu riba un manera responsabel a corto plaso por trata esaki. E ora ey e partinan di plaso cortico y plaso largo lo tin solucionnan sostenibel pa futuro con pa trata e desperdicio di Aruba. “Conhuntamente tur hende lo mester bay carga e gastonan aki pasobra na fin di dia tur hende ta contribui na locual cu tin na Parkietenbos.”
“E no tin color politico, e no tin un nomber, pero e tin mas di 100 mil nomber. Pasobra nos tur ta uz’e, nos tur ta manda nos desperdicio, nos tur ta lubida cu asina cu Serlimar busca e desperdicio na cas, nos ta kere cu nos responsabilidad a caba pero e no a caba”, minister de Meza a expresa.
