Hopi persona ta preocupa ainda cu e acuerdo firma pa reapertura di refineria, particularmente pasobra ta encera un pais cu problema economico / politico serio. Tambe como e ta haci Aruba mas atractivo pa Venezolanonan bin akinan na un cantidad mas hopi cu ya ta tumando luga. Minister encarga cu Asuntonan Economico Mike de Meza no ta mustra preocupacion pa e situacion di e pais y con e por afecta nos y ta papia di e topico empleo CITGO.
“E inversion di e refineria lo wordo haci na Aruba pa Citgo Merca, nan so ta haci esey pues e refineria di Aruba ta cay bou di operacion Mericano, henter e maneho cu ta bay tin na Aruba ta bay cay bou di CITGO corporation. Tambe tin cambionan cu ta tuma luga cu e CITGO Aruba lo cay bou di CITGO corporation Merca tambe.”
Situacion Politico Venezuela
Partinan interno den e politica di Venezuela lo mi no duna reaccion riba dje pasobra esey ta algo interno di Venezuela. CITGO corporation di Merca cu ta un filial di PDVSA a duna tur nan aprobacion for di presidente, presidente di PDVSA, minister encarga cu energia, directiva di dje, directiva di CITGO, presidente di CITGO, enfin tin cantidad di aprobacion cu tin. E detayenan di con huridicamente e ta hinca den otro mi ta laga esey pa huristanan.
Sr. De Meza ta sigui enfatisa cu e acuerdo definitivo di participacion ta firma cu CITGO, caminda cu CITGO ta e compania cu ta bay opera e refineria, nan lo ta responsabel y para garantia y lo haci inversionnan pa e refineria. E echo cu CITGO ta un filial di PDVSA, PDVSA na fin di dia ta un compania estatal. Si e presidente di Venezuela of cualkier minister kier papia di e refineria di Aruba como si fuera e ta di PDVSA, e ta nan libertad pa haci esey. Si PDVSA kier papia di dje of CITGO, huridicamente y de facto ta CITGO corporation ta e operador. E mandatario a splica cu CITGO ta un compania stabiel y ta opera hopi bon.
“Si bo kier traha un refineria na Venezuela, cu tin e capacidad y configuracion cu e refineria di Aruba cu tin e por dura di 6-9 aña y lo costa facil 9 biyon dollar. Na Aruba por haya un inversion di 1 biyon dollar y cuminsa cu e prome fase, den dos aña di opera e lo por yuda cu extraccion di e zeta pisa cu tin y cu por mehora esaki den un zeta di calidad halto. Mi ta kere cu mira economicamente e escogencia ta hopi mas facil ora cu tin un refineria disponibel (Aruba) 28 km for di bo cu ta den estado cu por cuminsa opera dentro di 1-2 aña . Tambe sabiendo e necesidad di aumenta volumen di crudo pa por bende esaki riba mercado pero tambe pa suministra bo refineria, analisis tecnico economico ta duna recomendacion pa bay den e direccion ey, cual mi ta supone cu nan a haci tambe”, Sr. De Meza a bisa.
Aruba tin garantia
“Un cos nos sa ta cu nos tin garantianan cu mester inverti na Aruba, garantianan cu si kibra e contract kico ta e consecuencianan, ken ta bay inverti y ken ta bay opera e refineria anto di unda e crudo ta bin. Venezuela ta e pais singular na mundo cu e cantidad di crudo mas grandi cu tin. Venezuela ta keda awe, aki 20, 50 100 aña un pais cu ta keda draai riba petroli. Venezuela den e balansa mundial ta esun mas importante pa futuro di suministracion di crudo fossiel pa operacion di refineria. E refineria na Aruba a wordo traha pa e crudo Venezolano den añanan 1924 bay ariba. E biaha aki e ta bay wordo uza den un diferente modelo economico, modelo di proceso pero tambe cu aworaki Aruba awor lo ta doño di e refineria.
Beneficio di refineria
A puntra Sr. De Meza ki tempo por spera cu pueblo lo tin beneficio di e refineria y tambe gobierno. El a bisa cu esaki ta inmediatamente despues cu e proceso di legalisa tur locual cu ta necesario, manera aprobacion di parlamento y contractnan ta firma y parlamento aproba esaki. Na e momento ey caba CITGO lo cuminsa busca hende y pueblo lo mira beneficio di esaki.
Si pa 1 augustus tur cos ta cla, segun CITGO su planificacion y presentacion duna, ta indica cu 500-600 hende mester ta labora eyden. Pa maart april e cantidad aki mester ta banda di 2800-3000 hende. Esaki ta den e refineria directamente pues por imagina kico ta e consecuencia, el a bisa. “Na Aruba e tipo di industria cu bo tin manera un refineria su efecto ta entre 2-3 biaha mas hopi cu locual ta traha den e refineria, pa sostene e operacion, pero tambe supermercado, luganan di paña, bendemento di cos di come etc.” Pues si ta papia di 3000 hende ta papia di 6000 hende sigur cu lo beneficia di esaki di un manera of otro. Na momento cu Parlamento pasa esaki, tur obligacion di gobierno ta cuminsa core di biaha (huur, impuesto minimo y otro responsabilidad financiero).
Segun Sr. De Meza CITGO kier tuma tur hende den servicio cu tabata traha cu e refineria caba. Pasobra e operacion di e tankinan di zeta (transshipment) mester sigui cana pero como CITGO, pues nan mester tur e trahadonan. “Ningun momento nan a indica cu nan no kier e trahadonan ey, al contrario nan tin hendenan na Aruba cu ta papiando cu Valero caba pa wak con e sistema ta na Aruba, ken ta trahando cu abogado etc.”. Den e periodo di rehabilitacion CITGO mes ta bay busca y papia pa wak cu e ta haya tur hende cu tabata traha den e refineria y ta interesa den tur. Nan tin acuerdo mescos cu refinerianan cu tabata conoce desde LAGO.
Terminando el a bisa si no tin personanan cu e credencial pa haci cierto trabou of proyecto, of si nan tin tur hende aki caba y nan mester di mas hende, e ora nan mester cana e camindanan tambe manera otronan a haci den pasado. Pa haci peticion pa pidi pa specialistanan pa bin Aruba, Sr. De Meza a bisa. Hendenan cu e compania ta responsabel pe, el a termina.
