Segun minister Dangui Oduber: Personanan cu a bin na remarca prome a cay den categorianan pa vacuna

Minister di Salubridad Publico, Dangui Oduber a bisa cu Aruba ta bin preparando debidamente pa e momento historico di ayera na Centro Don Bosco, unda a wordo duna e prome vacunanan di Pfizer contra Covid-19 na un grupo di 12 persona conoci den comunidad cu ta cay den categoria di riesgo of esnan cu ta 60plus.

E mandatario a bisa cu personanan aki a propone nan mes, ya cu pa hopi tempo caba nan a acerca gobierno cu nan ta desea di bin na remarca pa haya e vacuna. E intencion tras di escogencia aki tabata pa awe e personahenan aki por bira un ehempel di e prome yama pa haya e vacuna.

“Mi ta kere cu esaki awe por wordo considera un momento historico. E ta un etapa nobo pa nos aki na Aruba,” el a bisa. E mandatario a laga sa cu vacuna te na e momento aki e solucion, no solamente pa Aruba sino pa mundo. El a agrega cu e meta final di e vacunacion aki ta pa scapa bida di hende. El a probecha pa gradici gobierno Hulandes pa e prome lote di 11.700 vacuna cu a yega Aruba diamars ultimo.

E mandatario a bisa cu nan kier pa mayoria di nos poblacion por haya e vacuna aki. No tin motibo -segun minister Oduber- pa preocupa pa e vacuna su efecto. Ya cu e ta algo cu a wordo getest debidamente. “No tin motibo pa preocupa pasobra e vacuna ta algo safe,” el a declara. El a trece como ehempel Israel, Merca y Hulanda, unda e cantidad di persona hospitalisa ta bahando y tambe e cantidad di persona contagia cu e virus aki. E ta spera cu keto bay mundo lo bay na normalidad bek.

E mandatario a bisa cu Aruba ta un di e tiki paisnan den Caribe cu ya caba tin acceso na e vacuna aki. Ya cu tin hopi pais na mundo cu ainda no tin acceso na e vacuna pa ataca e pandemia actual.

Programa vacunacion

Cu e prome vacunanan duna ayera tanto na Centro Don Bosco como tambe na Horacio Oduber Hospital (HOH) a cuminsa oficialmente cu e programa di vacunacion contra Covid-19.

Minister Oduber a bisa cu -segun e planificacion- awe ta sigui dunamento di e vacuna na personal di DVG, HOH y tambe na IMSAN. Diabierna nan lo continua na hospital y IMSA. Diasabra nan intencion ta pa duna e dokternan di cas na Santa Teresita Center. Diadomingo nan tin plania pa duna e resto di personal di dunado di cuido.

Conforme cu nan planificacion nan ta habri siman proximo cu e vacunacion di tur esnan 60plus. Pa realisa e tarea di vacunacion aki, nan a condiciona cuater localidad pa duna e vacuna. Centro Don Bosco na Noord, JFK Education Center Oranjestad, Centro Deportivo Betico Croes na Sta. Cruz y Sta. Teresita Center na San Nicolas.