Segun minister di Salubridad Publico, Dangui Oduber, niun compania priva tin un contract cu AZV pa transporta e pashentnan di dialisis.
Pero den practica a resulta cu tin hopi pashent cu mester di e dialisis, pero cu no tin e transporte. El a bisa cu a dicidi pa gobierno mes tuma over e servicio aki pa transporta e pashentnan y esaki a wordo haci durante cuater pa cinco luna caba.
Na luna di april ora cu gobierno a haya instruccion di gobierno di Hulanda pa reduci gasto di AZV cu 5 miyon pa luna, AZV a haci un ehercicio pa reduci e suma substancial aki, teniendo na cuenta kico e asegurado tin derecho y no tin derecho, conforme e ley di AZV.
E mandatario a bisa cu e transporte di pashent cu ta dialisa no ta un derecho conforme e ley di AZV. “Un asegurado no tin derecho pa wordo transporta pa medio di un compania priva,” el a bisa. AZV a conseha gobierno pa stop e proceso pa transporta di dialisis. Ora cu esaki a sucede e pashent a keda sin transporte pasobra e organo di seguro general a bay termina e contract cu e compania.
“Esey tabata intencion di AZV pasobra esaki no ta algo cu ta wordo cubri pa ley. E no ta legalmente regla,” e mandatario a declara na Bon Dia Aruba. Nan a institui un comision zorg toeslag pa atende cu e transporte di pashent di dialisis, ya cu nan no por laga e pashent sin transporte tampoco ya cu nan mester dialisa tres biaha pa siman.
