Te ainda gobierno no tin un bista tocante e gasto general cu a wordo inverti pa contene e expansion di e coronavirus/Covid-19, y atende cu esun cu tin necesidad di cuido medico.
Minister di Salubridad Publico, Dangui Oduber no tin un bista exacto di e cifra cu a wordo gasta te aworaki pa atende cu e pandemia di Covid-19 den nos teritorio. Pa Oduber cada dia cu e crisis di Covid-19 ta continua e ta costa nos pais cantidad di placa. E ta placa cu pais Aruba no tin na e momento aki. Ademas e ta placa cu nos pais tin mester di dje pa yuda esnan cu a perde trabou.
“Nos no por bisa un cifra exacto. Pero nos por bisa si cu esaki ta core den miyones di florin,” el a declara.
Pa menciona algun ehempel, e mandatario a referi na e grupo di personal adicional cu ta bin yuda nos pa atende cu e unidad di cuido intensivo (ICU) cu Hulanda a pone disponibel pa Aruba. El a bisa cu Hulanda a percura pa tin financiamento pa e camanan, mashinnan pa hala rosea y remedinan.
Pero Aruba logicamente mester cubri e gastonan di acomodacion, cuminda y transporte di e personal aki. Mientras cu Hulanda lo paga e salario di e personal aki. Ya caba e gasto aki pa garantisa e presencia di e grupo di profesional di salud ta core pa basta placa, el a bisa.
Igualmente el a laga sa cu tin remedi adicional cu mester wordo busca pa atende cu e pashentnan di Covid-19. Tambe e expansion cu hospital mes bao su propio forsa pa adecua nan instalacionnan pa atende cu e pashentnan interna cu Covid-19.
Otro gasto tin di haci cu e gasto cu e crisis team tambe tin cune, relaciona cu expansion di personal. Pues sumando tur e gastonan aki y hopi mas, nan ta core entre miyones. Pero ainda gobierno no por bisa un cifra exacto, cuanto e pandemia aki a costa pais Aruba.
