Durante weekend, riba medionan di comunicacion local a circula informacion tocante un supuesto ‘impasse’ entre minister di Turismo, Dangui Oduber, y CEO di Aruba Airport Authority, Joost Meijs pa motibo di contratacion di personal.
“Sindicato STA a manda dos carta expresando preocupacion di mas di 60 trahador pa e proceso di seleccion cu ta tumando lugar na AAA cu segun nan, no ta conforme corporate good governance”, Oduber a declara pa Bon Dia Aruba. “Esaki di loke mi ta compronde di e cartanan ta cu personanan ta wordo tuma den servicio sin cu ta cumpli cu e rekisitonan [red: di e vacatura].”
Bon Dia Aruba a puntra Oduber si ta berdad cu tin ‘friccion’ entre su persona y Meijs. Oduber a splica cu for di tempo cu e CEO a duna 75 trahador na AAA nan retiro, siendo cu gobierno tabata subsidiando nan salario, ‘e relacion a sufri un deuk’. Esaki a bira pio tambe na momento cu a nota cu despues di a duna cantidad di hende retiro, awo e compania ta purba contrata otro hende.
“Awe nos ta constata cu e decision pa retira 75 mama y tata di famia tabata uno robes cu a costa e compania miyones”, Oduber a bisa. “Awe AAA ta habriendo vacatura tras vacatura y na aña 2021 e compania a haci mas di 20 miyon florin di ganashi. No tabatin ningun hustificacion pa ofrece paketenan na empleadonan. E tabata mas bien un decision cu por wordo yama na Hulandes: paniek voetballen!”
