Segun minister di Salubridad, Dangui Oduber ainda tin interes afo pa inverti den e actividad di plantacion, elaboracion y produccion di cannabis medicinal. Esaki a pesar cu economia mundial ta den recesion debi na e pandemia di Covid.
E mandatario a laga sa cu den ‘tur crisis tin oportunidad.’ Awor cu diabierna ultimo nan a cuminsa cana cu e proceso oficial di destaho publico, nan ta bay wak si e interes t’ey.
Segun e mandatario, na maart di 2020 gobierno a publica un Request for Expression of Interest (REOI) caminda 25 compania local y internacional a yega di expresa nan interes ya sea pa cultiva, procesa, importa, exporta pa Merca y asina nan por traha e producto final di cannabis medicinal.
E ta convenci cu ainda tin un grupo interesa, mirando e proyeccion cu tin pa cu e actividad economico aki. Igualmente el a bisa cu tur compania interesa por participa den e destaho aki. Te hasta e cuater companianan cu ya caba a haya permiso pa importa producto medicinal elabora cu cannabis pa bende nan den nos mercado local.
E ta haya cu esaki ta un oportunidad cu Aruba mester probecha, sino nos por perde, ya cu Corsou ta den dje caba y Jamaica ta otro isla Caribeño cu tin añanan den e actividad aki. Segun e mandatario e industria aki ta mustra di ta uno prometedor.
E hecho cu Aruba tin un marca turistico cu a construi cu hopi esfuerso pa decadanan, minister Dangui Oduber no ta kere cu e actividad di cultivacion, elaboracion y produccion di cannabis medicinal lo por afecta nos principal industria.
Coffeeshop
El a agrega cu Merca tin 31 estado cu a legalisa e uzo di no solamente cannabis medicinal, sino cannabis recreacional tambe manera California. Pero obviamente nan a tene cuenta cu e imagen cu por bin na momento cu Aruba ta duna luz berde na e cultivacion di cannabis cu fin medicinal. E no ta kere cu e decision aki lo por afecta nos imagen como destinacion turistico, y crea otro imagen cu Aruba a bira un paraiso cu nos ta promove droga. “Nos no ta bay tin coffeeshop na Aruba,” el a bisa na Bon Dia Aruba.
E mandatario encarga cu turismo a bisa cu nan tambe a tene cuenta cu e impacto cu un tipo di actividad aki lo por tin pa imagen di nos pais. Pero e ta kere cu e impacto aki lo por wordo evita si na momento cu bo ta bay over na cultivacion di cannabis, bo ta pone enfasis riba uzo medicinal y no recreacional.
Minister Oduber a trece e ehempel di Hulanda cu ta un pais liberalisa pa decadanan cu nan coffeeshop abiertamente riba uzo di cannabis recreacional. Pero na Aruba esey no lo ta e caso den e constelacion di gobierno actual, el a laga sa.
Segun e mandatario nan no ta kere den e proceso recreacional. Te hasta ni den cual cualkier gobierno den futuro cu partido MEP lo forma parti di dje. “Nos ta kere strictamente den e proceso medicinal,” el a bisa.
Finalmente e no ta kere cu e actividad aki lo afecta nos imagen turistico como pais ya cu nan a bin cu condicionnan hopi stricto cu e producto final di loke ta wordo cultiva mester ta cu e proposito medicinal.
