Segun minister Cicilia, a pesar cu lo desea un persona local: Cualificacion ta mas importante pa un persona asumi posicion como CEO di AAA

Manera ta conoci, Gobierno di Aruba a firma diahuebs atardi un MoU pa continua cu e cooperacion entre Aruba Airport Authority (AAA) y Royal Schiphol Group (RSG). Durante e conferencia di prensa, prome minister Mike Eman, minister di Turismo Wendrick Cicilia, minister di Finanzas Geoffrey Wever y director di Asuntonan Internacional di RSG, Kjell Kloosterziel a firma e MoU.

Durante e ronda di pregunta, e mandatarionan tabatin e oportunidad pa contesta varios pregunta di miembronan di prensa presente. Un di e preguntanan cu a bin dilanti ta relaciona cu e ley di LNT (Landsverordening Normering Topinkomens) cu ta sigura cu tin limitacion pa e salario di un ehecutivo.

Minister Wever a splica cu den e MoU ta bisa cu gobierno ta considerando pa haci un excepcion, y a indica cu ta bay traha riba esaki y motiva esaki. El a remarca cu e caso aki ta un caso specifico y cu no tur caso ta mesun cos. “No tur entidad estatal ta mesun cos, no tur organisacion ta mesun cos, tur tin nan mesun desafionan, nan mesun cuadro y esey ta locual nos tin cu bay neem mee ora tuma un decision asina,” el a indica.

E mandatario a señala cu esaki ta e direccion strategico cu gobierno a scoge y nan ta considera e relacion cu RSG uno hopi importante. El a remarca cu e ley ta duna espacio pa excepcion y esey ta locual nan a palabra den MoU cu Gobierno di Aruba ta bay haci tambe.

Di su banda, minister di Turismo, Wendrick Cicilia a splica cu den e reunion cu nan tene nan a comparti e vision strategico cu gobierno tin y a anuncia tambe cu esfuersonan di Gabinete AVP-FUTURO ta bay enfoca riba continuidad di e cooperacion strategico.

“Esaki ta un prerogativo di e accionista mayoritario exclusivo, cu ta identifica e liñanan grandi di maneho, y bo directiva y Raad van Commissaris tambe tin e responsabilidad pa contribui pa logra realisa e accion aki. Den e cuadro aki nos a anuncia cu pa nos, e ta di balor agrega e continuidad di e cooperacion strategico, y esaki a ser comunica,” el a indica.

Pa loke ta e futuro director cu lo ta encarga cu maneho di aeropuerto, si ta buscando un persona local of di afo, minister Cicilia a splica cu e intencion y deseo ta busca un persona local. El a agrega cu den e caso aki locual ta importante pa gobierno ta cooperacion y e parti di maneho di e aeropuerto, y mirando e complehidad di maneha un instituto y organisacion di e magnitud aki, e ta rekeri cierto experticio, cierto criterio y obhetivo cu e persona cu lo asumi e funcion aki mester cumpli cune.

El a sigui splica cu ora nan a comunica na Royal Schiphol Group cu nan deseo ta pa busca un persona local pa e trabou, e no tabata un punto cu lo hiba na descontinuacion di e cooperacion strategico. “Nos deseo claro ta un local, pero esaki no tabata punto di kiebro pa nos den locual tabata e discusion y dialogo cu tabatin. Importante ta cu tin personanan cualifica cu a base di criterionan y obhetivo por cumpli cu cierto profielnan y mantene e standard halto cu nos tin na e momentonan aki,” minister Cicilia a enfatisa.

Di su banda, Kjell Kloosterziel di Royal Schiphol Group a splica cu e contract, manera cu nan tin e aworaki, nan no por cambia hopi. El a indica cu e contract lo bira mas specifico y mas detaya tocante con y kico exactamente e nan ta bay haci hunto. “Mi ta kere cu ta hopi sabi pa haci esaki hunto, pa haci mas cla kico nos por spera di otro y kico nos ta bay haci,” el a indica.

El a sigui splica cu ainda nan ta den e fase di reanuda negociacionnan y a remarca cu e parti di traspaso di conocemento y construccion di capacidad di ambos banda ta un parti hopi importante di e contract aki, cu ya e tabata den pasado.

“Training y coaching di talento local, tanto aki na Aruba, como tambe oportunidadnan ofreci pa haya experiencia cu otro aeropuertonan den e Grupo Schiphol, pa medio di bishita of comparti conocemento, ta componentenan hopi importante cu lo ser salvaguardia mas ainda den e contract aki,” el a indica.

Pa loke ta trata contratacion di un persona local of di afo pa dirigi maneho di e aeropuerto, Kloosterziel a subraya cu esey nunca no tabata un condicion. El a enfatisa cu nan ta responsabel bou di e contrato actual y e contrato den futuro pa nombra un hefe ehecutivo capaz y di calidad halto.

“Nos ta scoge e miho persona cu nos por haya pa e proposito ey, a base di criterionan obhetivo cu nos ta determina hunto cu e Raad van Commissarissen,” el a enfatisa.

Kloosterziel a agrega cu e ta kere cu tin hende hopi capaz cu ta realisa e trabaonan di aeropuerto, cu kendenan tambe, el a indica, nan ta traha hopi di cerca, cu sigur tin e potencial pa por hunga un rol den esaki den futuro.

El a indica cu tin varios candidato cu a ser entrena y supervisa na Royal Schiphol Group. Menos durante nan trabou aki na aeropuerto, door di e CEO cu nan a nombra. El a agrega cu e ta kere cu por tin varios motibo, sin semper ta envolvi den dje, dicon te cu aworaki solamente a haya CEOnan di exterior.

Pa loke ta trata e maneho interino di e aeropuerto te cu aworaki, Kloosterziel a agrega cu e ta kere cu nan a haci un hopi bon trabou, specialmente teniendo na cuenta e situacion cu nan a enfrenta na momento cu a nan a asumi e maneho interino.

“Nan a drenta e aeropuerto den un situacion hopi dificil, pa yuda e maneho di CEO temporalmente pa actua durante e periodo den cual no tin CEO, ademas di nan actual actividadnan. Pues mi ta kere cu como Schiphol Group , pero mi ta kere tambe como Pais Aruba, nos tin cu e personanan aki un debe grandi di gratitud pa ta dispuesto pa haci esaki,” el a remarca.