ORANJESTAD – Minister di sector primario, Chris Romero, tambe a tuma nota cu den e rapport pa construi e ley di ROP nobo, e parti di agricultura no tin mucho informacion den dje. Tambe el a wak cu e ROP nobo ta limita ‘cierto cosnan’. A pesar di esey si nan ta tene na cuenta pa tin tereno disponibel pa e hendenan interesa cu kier haci agricultura pa futuro.
A pesar di e falta di informacion mas detaya di e ROP nobo, Romero a sigura cu tin terenonan poni un banda pa agricultor. E no tin un cifra exacto, pero e ta kere cu por lo menos nan ta 100 parcela pa agricultura di alrededor di 500 meter cuadra.
Den e proceso pa comunidad y instancianan entrega tur inkietud y preguntanan, un inkietud tabatin di haber con sector di agricultura ta para den e ROP nobo. Considerando agricultura como un di e seis pilar di e plan economico di gobierno, mester tin mas claridad y atencion den e ROP nobo aki pa e sector primario aki.
Segun e mandatario, nan ta trahando un maneho riba e procedura pa bo por haya un pida di tereno destina pa agricultura. E ta haya cu conhuntamente cu minister di infrastructura mester bin cu e rekisitonan y exigencianan cu gobierno tin pa otorgamento di tereno pa actividad di agricultura.
