ORANJESTAD – E siman aki, e migrantenan cu a keda deteni pa Guarda Nos Costa a cuminsa denuncia via rednan social e situacion cu nan ta considera uno penoso y un violacion fragante contra derechonan humano, pero tambe como migrantenan cu a bin busca asilo na Aruba.

Minister di husticia, Andin Bikker a reacciona un biaha mas riba e denuncia haci contra Guarda Nos Costa, y violacion contra derechonan humano, y tambe contra esunnan cu a pidi asilo y toch ta wordo deteni y deporta. Segun e mandatario, esunnan cu ta wordo deporta no tin asilo of no tin caso di asilo. Nan ta e personanan cu Guarda Nos Costa a gara nan trahando, sin un status y cu diripiente ora cu nan ta keda deteni, nan ta bel pa asilo.

Meldplicht
Mientras cu el a tuma e decision pa duna e grupo cu ta deteni y cu tin solicitud di asilo meldplicht. Nan ta un total di 17 cu lo haya e posibilidad di no keda deteni, pero si nan mester reporta regularmente cerca nos autoridadnan competente, te ora nan status ta wordo defini. E mandatario a indica cu nan ta wordo duna e beneficio di meldplicht, y e ta spera cu nan por cumpli. Pasobra e experiencia cu nan tin ta cu ora nan ta duna nan e meldplicht ‘bo no ta wak nan mas.’

El a splica cu e articulo hinca den ley ta aparece e figura huridico cu nan por duna meldplicht. Pero e ta hopi rigido, debi cu hopi persona cu nan a duna meldplicht, bo no ta wak nan mas. Otro argumento tin di haber cu personanan cu nan a yega di gara trahando ilegal, y cu di repiente nan kier aplica pa asilo. Segun e mandatario, nan ‘no por laga nan bay perdi for di bista’.

E ta considera e situacion aki uno fastioso, pero Aruba no tin espacio ni infrastructura pa aloca problema di e paisnan di nos region. Ademas, como minister di husticia, e tin e responsabilidad pa garantisa orden publico, siguridad di nos habitantenan y nos bishitantenan. Pero tambe nan mester protege nos mercado laboral.

Nan ta ripara cu e indice di crimen a aumenta, debi cu tin personanan cu a bin di afo pa comete acto criminal riba nos isla. Aña pasa, di un gran cantidad di 33 atraco cometi te luna di november, 18 di e personanan deteni tabata di procedencia di Venezuela. Igualmente, el a laga sa cu un par di e personanan aki ta entre e sospechosonan cu a purba di pega candela na KIA. E tipo di actitud aki ta aceptabel, el a declara.

“110 mil habitante nos tin. Venezuela tin 30 miyon!,” el a bisa. E ta haya cu actualmente -te unda nos por- tin basta Venezolano na Aruba cu nos pais a adopta directo of indirectamente. E ta spera cu e situacion di Venezuela por haya un solucion pronto, ya cu Aruba tambe ta victima di e circunstancia aki.

E mandatario a bisa cu tur esunnan deteni tin posibilidad di apela riba nan detencion. Bikker a expresa cu un hues comisario a evalua si nan ta deteni hustamente of no. Igualmente e mandatario a reacciona riba e cuestionamento cu e detenidonan di origen Venezolano no ta wordo deporta directamente pa Venezuela, sino via Colombia.

Bikker a laga sa cu nan ta haciendo esaki pa nan mesun bon. Esaki debi cu e vuelonan pa Venezuela no ta uno regular. Recientemente tabatin dos vuelo pa siman y ultimamente practicamente e vuelonan a stop debi na e ceramento di e frontera imponi pa e regimen Maduro contra e islanan Hulandes. Nan a cuminsa deporta e Venezolanonan deteni via Colombia, pero e ta aclaria cu ta trata di personanan cu no a pidi asilo.