Un biaha mas minister di Enseñansa, Armando ‘Rudy’ Lampe a afirma cu SKOA mester tene su mes na e fayo cu Corte a duna riba e trahadonan di limpiesa na servicio di e fundacion aki.
Segun e mandatario, e no ta na altura di niun caso di apelacion contra e sentencia cu corte a duna caba, y cu a keda resolvi na fabor di e ministerio di enseñansa.
E ta un decision cu corte a tuma basta luna pasa caba. Den e caso aki y te hasta unda e mandatario sa, no tin apelacion riba e caso aki. Ademas e caminda legal cu SKOA a cana –segun minister Lampe – no ta haci posibel tampoco cu bo por papia di un apelacion. Ya cu e caminda cu SKOA a cana huridicamente ta hiba na final na un conseho of advies na e minister, y no un caso pf procedura huridico civil.
A base di e fayo aki, minister Lampe a bisa cu su ministerio a tuma e decision di aplica ley. “Pasobra bo no por keda den un situacion di ilegalidad, despues cu tin un sentencia di ley,” el a declara.
Pasobra e ta haya cu loke ta sosodiendo ta ilegal, y e mester wordo coregi. Den varios ocasion e mandatario a referi na e impasse aki cu SKOA, caminda el a yega di expresa cu e fundacion aki mester a coregi e situacion di un grupo di nan trahadonan (werkster) cu a haya e status di ambtenaar ilegalmente.
Den e caso aki e mandatario a indica cu SKOA ta e dunado di trabao y nan ta e prome responsabel pa coregi e situacion aki. E ta argumenta cu no ta trata aki di kita hendenan for di trabao. Te hasta gobierno a pone extra fondo disponibel pa asina aki ‘niun hende keda sin pan ariba mesa.’
