Diahuebs ultimo Minister di Transport, Integridad, Naturalesa y Asuntonan di Adulto Mayor, Ursell Arends, a tene un conferencia di prensa na unda durante e ronda di pregunta di miembronan di prensa el a elabora ariba e tema di RWZI y a informa cu mas tarda pa fin di februari tur e RWZI nan ta wordo privatisa.

Minister Arends a remarca cu e problematica di Bubaliplas no ta algo di awo. El a splica cu desde 1997 ya caba DOW a informa gobierno cu RWZI a surpasa su capacidad di carga y na 2002 caba tabatin e prome caso den corte caminda e propietario di un hotel a hiba gobierno corte.

El indica cu na 2018 ora cu e no tabata un parlamentario ni tampoco un gobernante ainda el a hiba e tema di RWZI como un tema nacional y a cuminsa e discusion ariba e tema aki. El a sigui splica cu na moemnto cu a forma e gabinete aki,a palabra conhuntamente cu e partner den coalicion, cu Prome Minister awe, cu parti di loke ta trata maneho di desperdicio tanto likido y solido lo cay bao di e Ministerio di Naturalesa.

Aunke e operacionnan ta wordo supervisa pa DOW, e mandatario a indica loke ta trata maneho di desperdicio likido y solido ta cay bao di e Ministerio di Naturalesa.

Minister Arends a agrega cu a traha un comision cu a atende cu loke ta trata e privatisacion di e RWZI nan y tambe e cadena di rioolering. Segun el a señala, ta bay tin inversionnan cuantioso cu ta bay tuma luga, e ley pa privatisacion a bay Raad van Advies y a bin back caba, y aworaki DWIZ ta trahando e nadderrapport. Un bes esaki ta cla e ley lo bay back Parlamento y, segun el a señala, ta premira cu den luna di februari esaki lo tuma luga.

El a menciona cu durante e ultimo dianan di 2023, el a inverti for di su Ministerio un tiki mas cu 400 mil florin y conhuntamente cu otro instancianan den comunidad cu tambe a pledge fondonan, nan a haci inversion pa minimalisa e holo conforme e veredicto di e hues den e caso di Amsterdam Manor contra pais Aruba

“Di e forma aki nos ta cumpliendo cu e veredicto y ta minimalisa e impacto cu tin pa pais Aruba, pero tambe full e area aki,” el a remarca.

E mandatario a resalta cu desde status aparte ta conoci caba cu mester bin cambionan pa loke ta trata con ta atende con e RWZI nan, tin tres RWZI actualmente. El a informa cu pa februari e RWZI nan lo wordo privatisa.

“Ta bay tin solucion no solamente a corto plaso, pero tambe a largo plaso, con ta bay atende cu esaki. E gobierno aki tin su enfoke pa solucion y riba esey nos ta keda enfoca, pa trece solucionnan berdadero pa e comunidad di Aruba cu no tin ningun impacto pa nos economia,” el a enfatisa.

El a resalta cu si gobierno cumpli cu loke gobierno a compromete su mes pa loke ta trata e maneho y inversionnan cu mester tuma luga den RWZI, e ora gobierno no necesariamente mester paga e dwangsom di dies mil florin pa dia te cu un total di 250 mil florin na Amsterdam Manor conforme e veredicto di hues den e caso aki.

E mandatario a indica cu pa otro siman e ekiponan cu tin na RWZI ta bay ta back den funcion, segun loke DOW a informa su persona y Prome Minister.

El a agrega cu e inyeccion di e bioaugmentation tanto den e rioleering como den e planta mes tambe ta tumando luga, y segun el a señala, esaki ta dunando resultado pasobra e mal holo provoca pa Bubaliplas a minimalisa.

Minister Arends a indica cu dia 30 di januari e tin un reunion cu e compania cu ta encarga pa traha e bioaugmentation pa Aruba pa asina por tin un actualisacion di tur e trabaonan cu ta wordo haci y cu cual efectividad esakinan ta tumando luga.

“E solucion ta den porta. Februari mas tarda RWZI ta wordo privatisa pa un compania cu ta yama AWSS (Aruba Wastewater Sustainable Solution). Nan tin ya caba compromisonan financiero pa inverti den un RWZI completamente nobo, pero den corto plaso, nan lo inverti tambe den un RWZI mobil cu por procesa un total di 4500 cube di awa,” e mandatario a splica.

El a sigui splica cu e planta cu tin ta procesa 4500 cube di awa y ta bay bin un planta mobil pa procesa e mesun cantidad adicionalmente y di e forma ey e por acapara tur e awa cu ta yega y procesa esaki na un nivel cu ta riba standardnan internacional. Mientras tanto ta inverti pa desaroya un planta completamente nobo.

El a menciona cu durante weekend ultimo el a sinta cu e propietario di e hotel Amsterdam Manor pa nan ta na altura kico ta e stapnan cu Gobierno di Aruba ta tumando.

“Pa mi esaki ta un situacion critico. Mi ta asumi mi responsabilidad cu hopi madurez y sigur mi kier brinda confiansa tambe. Na final di dia ta un biaha bo tin pa gana e respet di otro persona, dus mi ta asumi mi responsabilidad cu hopi respet y garantisa full e sector priva cu e pasonan necesario ta wordo tuma pa asina minimalisa e impacto di RWZI riba nan operacion di negoshi, pero tambe riba nos economia,” el a enfatisa.