Despues di merdia, despues cu prome minister Evelyn Wever-Croes hunto cu e ministernan di MEP a entrega e retiro di Gabinete Wever-Croes II na su excelencia Gobernador di Aruba, ministernan di partido RAIZ, Ursell Arends y Geoffrey Wever tambe a haci entrega di nan carta di retira cerca Gobernador di Aruba.
Na salida di nan encuentro cu Gobernador lider di partido RAIZ, minister Ursell Arends a duna declaracion na prensa durante el a clarifica cu RAIZ no a forma pacto cu oposicion pa vota pa parlamentario Raymond Kamperveen pa presidente di parlamento. “Ningun momento RAIZ a acerca ningun miembro di oposicion pa vota pa parlamentario Kamperveen. Den pasado oposicion a vota pa Sr. Kamperveen, esaki no ta algo nobo,” el a agrega.
Minister Arends a splica cu diadomingo atardi RAIZ a reuni cu prome minister y a pidie pa MEP nomina otro candidato pa presidente di parlamento cu no ta Sr. Edgard Vrolijk pa garantisa sosten di fraccion, pero esaki no tabata e caso y manera partido RAIZ a indica diadomingo anochi durante un conferencia di prensa, si MEP no nomina otro persona pa bira presidente di parlamento, RAIZ lo sostene Raymond Kamperveen pa presidente di parlamento.
El a enfatisa cu como RAIZ y como ministernan demisionario tanto su persona como minister Wever lo keda forma parti di conseho di minister te ora bin un gabinete nobo. El a sigura comunidad di Aruba cu na ningun momento nan lo permiti pa e pais bira inmanehable y cu nan lo sigui traha pa garantisa stabilidad y continuidad.
“No ta paso gobierno ta demisionario nos ta bay permiti weganan politico tuma luga sea den conseho di minister of den sala di parlamento. Nos mester garantisa e comunidad di Aruba stabilidad,” el a resalta.
Minister Arends a indica cu despues cu a wordo anuncia publicamente cu Gabinete Wever-Croes II lo continua mas, nan a mira un cantidad di atake di coleganan cu tabata forma parti di conseho di minister a traves di rednan social, locual e mandatario ta haya lamentabel.
Pa loke ta trata e motibo pakico a baha gobierno, el a indica cu for di su punto di bista kizas no ta un motibo valido pa baha gobierno, pero e ta keda na cada ken pa dicidi kico nan sentimento ta y con nan pensamento ta.
Pa loke ta eleccion, cual ta bay ta dia 6 di december binidero, e lider di partido RAIZ a indica cu su partido ta cla pa eleccion. El a splica cu talbes pueblo di Aruba no tabata en espera di un eleccion, pero partido RAIZ si ta cla. “Nos ta bay garantisa e pueblo di Aruba cu nos tin candidatonan profesional cu nos lo sigui fortifica e plataforma aki pa sigui sirbi comunidad manera nan ta spera,” el a destaca.
