Dialuna mainta, minister di Transporte, Integridad, Naturalesa y Asuntonan di Adulto Mayor, Ursell Arends, durante conferencia di prensa a toca e punto di Arubus y a splica kico ta e plan cu tin aworaki pa mehora situacion na Arubus.
Durante e ronda di pregunta, minister Arends a ricibi pregunta for di miembro di prensa si e tin plan pa e situacion cu tin den Arubus na e momentonan aki of si ta bay adkiri un flota di bus nobo pronto.
Contestando e pregunta aki, e mandatario a splica cu ora el a tuma over e cartera di Transporte el a encontra Arubus den un situacion financiero hopi delicado, mirando cu nan ta den debe. El a sigui splica cu aña pasa Ministerio di Transporte a logra cera un ‘service level agreement’ (acuerdo di nivel di servicio) nobo cu Arubus y aworaki tin un plan.
“Nos ta trahando conhuntamente cu Raad pa inversionnan cu mester tuma luga den Arubus. Y tambe mi a bisa anteriormente cu e parti di inversion den nos capital humano ta importante. Mescos cu a haci na SABA y Serlimar, Arubus tambe mester atende cu e trahadonan pa loke ta trata inversion den nan, pero tambe lo bin inversion den e flota di bus,” el a resalta.
Minister Arends a remarca cu tin 30 bus nobo, di cual 15 di nan a yega na 2019 y e otronan a yega na 2021 y durante un bishita cu el a realisa na Arubus no mucho tempo pasa el a tuma nota cu shete di e busnan aki ya caba ta for di servicio.
El a subraya cu e calidad di busnan cu a wordo busca no tabata optimal pa Aruba y aworaki nan ta bezig cu e due diligence pa busca busnan cu no solamente ta ekipa pa condicionnan cu Aruba tin, pero ademas di esaki, el a indica, nan ta bay pasa over na busnan electrico pa garantisa sostenibilidad
Adicionalmente miembro di prensa a puntra minister si esaki lo sucede e aña aki ainda, na cual e mandatario a contesta cu e aña aki nan ta trahando riba e bus stacion na San Nicolas conhuntamente cu minister Geoffrey Wever di Economia pa duna esaki un actualisacion.
Pa loke ta trata e hermentnan y area di trabao di e trahadonan, el a menciona cu esey tambe ta algo cu nan a discuti siman pasa cu e sindicato cu ta representa e trahadonan di Arubus.
