Segun minister Andin Bikker: Preocupacion di SIMBA ta atendi cu prioridad

Recientemente sindicato di brandweer di Aruba (SIMBA) a yega di trece nan preocupacion riba nan falta di instrumento- y materialnan den bon condicion pa realisa nan trabao. Minister di Husticia, Andin Bikker a bisa cu nan ta atendiendo cu e retonan cu e cuerpo aki tin.

Sinembargo el a remarca cu prome cu SIMBA a conoce un directiva nobo, nan no tabata al tanto di preocupacionnan cu tabata existi den e departamento aki. Pero el a gradici na e directiva nobo di e sindicato cu a cuminsa trece dilanti nan preocupacion.

El a informa cu como prioridad nan a dicidi cu tur siman nan lo reuni cu directiva di brandweer y tambe nan sindicato, pa atende e tipo di preocupacion y problema y evalua cada un di nan. Asina nan ta mantene un bista den tempo real riba e retonan y con nan ta progresando pa atende nan. Tur siman esaki lo tuma luga te ora cu nan por logra soluciona tur nan preocupacionnan.

Tambe nan kier institui un task force netamente pa brandweer cu ta regarda entre otro pa bin cu un stacion na Santa Cruz. Pero a presenta e prome dos caso di coronavirus cu a pone nos pais den e situacion cu nos ta aden. Tur esaki a ocasiona un retraso den nan plan pa mehora y resolve e preocupacion cu SIMBA a trece dilanti, segun e mandatario.

Brandweer nan preocupacion tin di haci cu nan falta di material y tambe riba uniform nobo. Tabatin un diferencia di opinion riba kico mester bay riba uniform, pero ya nan a traha un diseño cu ta carga e aprobacion di e directiva di SIMBA y director di e departamento aki. Actualmente -segun e mandatario- nan ta den proceso di por haya e uniform aki. Pero nan a tarda un poco debi na e situacion cu a presenta den henter mundo pa e coronavirus.

E mandatario a bisa cu ya caba a cuminsa atende algun di e dañonan relaciona cu stoelnan y airconan cu nan a wordo reemplasa. Pa loke ta e autonan special y costoso di brandweer, Bikker a informa cu nan a cuminsa busca un compania pa bin cu un acuerdo di servicio pa percura cu e autonan aki por haya nan drecha y mantencion. Nan ta un compania cu experiencia riba e tipo di truck aki.

Igualmente el a bisa cu su ministerio a manda un carta pa Washington a base di e mesun tipo di cooperacionnan cu Aruba tin cu Hulanda. Kiermen cu pais Aruba por haya e tipo di autonan special pa diferente departamento di husticia. Pero e tipo di truck cu brandweer Aruba ta uza ta wordo fabrica na Merca. Nos tin acuerdo di amistad cu Doral (FL) y tambe cu Boston, for di unda nos por haya autonan pa renoba ‘mescos cu nobo’. E no ta descarta cu por ta auto nobo tambe. Ya esaki a yega di sosode den pasado den e servicio cu e departamento aki ta duna nos comunidad.