ORANJESTAD – Minister di Husticia, Andin Bikker a referi na e echo cu for di KIA un prizonero tabata saca potretnan y divulga nan via Facebook.
Nan a tuma accion di biaha, unda e personal a bay inspecciona e celnan y nan a descubri diferente artefacto, entro otro celularnan. E mandatario a anuncia cu lo bin cu mas ayudo tecnologico na KIA pa detecta den tempo record e tipo di aparato aki den prizon.
E mandatario a laga sa cu e situacion aki por sosode te hasta den prizon mas moderno y cu ekipo di control sofistica. Na Hulanda tambe a yega di sosode recientemente un situacion similar, y aki na Aruba e no ta algo singular. “Pa un motibo of otro nan lo por pasa for di scan. E no ta algo inusual…” Bikker a declara.
Encuanto echo di corupcion den e centro penitenciario cu ta facilita pa presonan por tin acceso na cosnan cu ta prohibi pa nan, e mandatario tabata masha reserva pa emiti un opinion riba esaki.
Sinembargo, riba e parti di integridad den KIA, el a bisa cu nan no a haya indicacion cu e caso aki ta acopla na un persona of otro di staf di e instituto aki. Semper cu ta sosode cualkier incidente cu mester tuma paso disciplinario, nan a yega di tuma nan, segun e mandatario. “Varios nos a tuma, pero mi no ta kere cu ta husto pa bay generalisa akinan a base di un incidente,” el a bisa.
Igualmente, el a laga sa cu e proceso pa nombra un director nobo den KIA ta canando. Un comision a keda institui, y minister a pidi nan pa haya un informacion di e entrevistanan cu a yega di realisa cu e candidatonan interesa pa e funcion aki. Tambe el a haci un apelacion na e comision, pa prome cu fin di februari pa haya e ‘voordrag’ pa bay na conseho di minister pa nombra un director permanente pa KIA.
