Minister di Husticia, Andin Bikker a informa cu gobierno lo instala un comision pa duna nan conseho, si pais Aruba lo por aplica na e concepto di ‘Civic Crowd Funding,’ pa recauda fondo y asina varios proyecto comunitario por bira realidad. “Hopi biaha nos tin e deseonan, pero e fondonan ta limita,” e mandatario a declara.
Den su ministerio por ehempel, nan tin e implementacion di e ley pa loke ta trata proteccion di bestia, caminda tin diferente proyecto y concepto cu a wordo presenta den e cuadro di e ley aki. Sinembargo, a pesar di e deseonan y plannan, tambe tin e retonan financiero.
P’esey nan ta evaluando pa eventualmente pa haci uzo di e concepto di Civic Crowd Funding como un posibel solucion. Pero prome nan mester haya e conseho di e comision cu lo wordo instala pa asina explora e posibilidad pa recauda fondonan pa medio di e concepto di Civic Crowd Funding.
E mandatario a indica cu dependiendo di e conseho di e comision, e concepto aki ta haci cu nos lo bay den un dimension nobo pa realisa cantidad di proyecto. Na Hulanda nan a realisa mas cu 800 proyecto via e tipo di concepto aki, segun Bikker. Aki na Aruba e concepto aki ta wordo realisa na otro escala cu e proyecto Doet, cu a yuda pa drecha y restaura varios instancia comunitario.
