Despues di 9 luna di negociacion entre sindicato STA y gerencia di aeropuerto, esta Triple A N.V., finalmente a keda firma un protocol entre ambos parti diabierna ultimo.
E acuerdo aki entre otro lo trece stabilidad y pas laboral den nos terminal aereo principal cu ta fundamental pa nos industria turistico. Asina Mediador di Gobierno, sr. Anselmo Pontilius kende tabata un piesa clave pa e firmamento di e protocol aki a manifesta na Bon Dia Aruba.
Sr. Pontilius a bisa cu den su funcion pa intermedia a presenta un alternativa cu ta mas realistico y cu ta cuadra cu loke nan mester tene cuenta cun’e.
“Bo por tin bon resultado aworaki, pero mester ta cauteloso pa motibo cu nos sa cu e desaroyonan den Latino America. Y cualkier golpi cu bo por haya na Merca bo tin cu tene cuenta cu bo entrada lo bira menos sigur”, Mediador di Gobierno a declara na e matutino aki.
Segun sr. Pontilius nos mester ta consciente cu aeropuerto sigur lo ta sensitivo pa cualkier situacion cu lo por pasa afo, pa ehempel ora cu na fin di aña bo ta compara e desaroyo cu a tuma luga compara cu aña pasa. Tur esaki pa motibo cu nos ta hayando menos ingreso di turistanan cu ta bin pa ehemplo di Brasil, Venezuela y eventualmente otro paisnan cu ta pasando den problema interno.
Protocol y CAO
E proceso di negociacion entre sindicato STA y gerencia di aeropuerto (Triple A) pa logra un contracto colectivo (CAO), no a bay nada facil. Pero finalmente diabierna ultimo a keda firma un protocol cu ta e antesala pa e firma oficial di e CAO. E protocol aki ta e resultado di e intermediacion di Mediador di Gobierno, sr. Anselmo Pontilius entre e dos partidonan.
Sr. Pontilius a relata na Bon Dia Aruba cu diaranson ultimo tanto STA como gerencia di Triple A, a yega na un acuerdo no oficial den principio. Diahuebs e sindicato STA bay internamente cerca su miembronan, caminda nan a haya aprobacion unanime pa loke ta e pakete financiero, y diabierna ambos partido a firma un protocol of acuerdo di compromiso.
Eventualmente aki dos siman nan lo bay firma e CAO pa cuater aña. E ta haya cu ariba su mes e protocol aki ta un resultado positivo, despues di varios luna cu nan ta na mesa negociando. Nan ta calcula cu pa 15 di juni e documento di e CAO lo ta cla. Pero cu e protocol firma diabierna ultimo, esaki ta nifica cu nan tin un acuerdo y pas laboral garantisa.
Recomendacion
Oficina di Mediador di Gobierno a recomenda e partidonan particularmente cu nan tin un trabou grandi pa orienta e trahadonan ariba entre otro costo di operacion di aeropuerto. Finalmente el a sigura cu e trahadonan di aeropuerto ta gosa kisas di un di e miho CAO, entre un cantidad di CAO cu tin na Aruba. E ta un CAO di un peso enorme y di condicion di trabou garantisa pa cada trahado.
“Ta importante pa señala cu e trahadonan nan condicion di trabou sigur a conoce un adelanto positivo. Y esaki ta parti tambe di e resultado di un aeropuerto operando na un nivel excepcional”, el a bisa na e medio aki.
