Mediador di Gobierno, Anselmo Pontilius ta haya cu ademas di keda na cas y keda safe, un palabra clave ta solidaridad pa contraresta e impacto cu e coronavirus/Covid-19 a ocasiona na tur nivel na Aruba.
Mirando e situacion aki e ta haya cu mester di un gran acuerdo nacional. Na prome luga percura semper di yega na un acuerdo interno na pia di trabao. Tin empresa cu inicialmente mester a reduci ora di trabao pa tur hende keda cu un pida di pan, prome cu nan cuminsa manda nan trahadonan cas. Pues e ta bisa cu e parti di solidaridad ta un rol grandi.
“E solidaridad ta un palabra grandi, pero den practica ta nifica cu nos ta comparti cu otro, bisiña, amigonan y nan tur,” el a bisa. Esaki pa motibo cu tin un situacion hopi serio y cu no ta un situacion cu ta haya solucion den un siman.
Algun dunado di trabao a manda trahadonan cas y sin salario, sin traha un plan di sobrevivencia prome pa garantisa mas puesto di trabao posibel. Otronan a cuminsa reduci substancialmente e salario di e trahadonan, apenas e crisis a cuminsa. Tin situacion di trahadonan cu despues di hopi aña di servicio a wordo manda cas memey di un incertidumbre si nan ta wordo tuma bek. Pero tambe un incertidumbre si nan ainda tin nan derechonan adkiri of si nan a perde nan durante e crisis aki.
Pontilius ta considera importante pa pais Aruba, gobierno, parlamento y tur gremionan yega na acuerdonan concreto riba e situacion genera pa Covid-19. Logico cu e prioridad ta bay pa contene y controla e malesa riba su mes. Pero e parti socioeconomico ta hopi importante pa tin palabracionnan concreto.
Pontilius a referi na e trahadonan cu tin hopi aña di servicio den un empresa y mesora nan a wordo manda cas. E ta haya cu cualkier compania cu a manda un trahado cas, e por hacie. Pero e dunado di trabao tin un obligacion prome pa yega na un acuerdo mutuo cu e trahado.
“Ningun dunado di trabao pa ley no por dicidi unilateralmente di haci loke e kier,” el a bisa. Pues nos leynan ta keda vigente apesar di un crisis debastador na nivel mundial. E ta un crisis cu niun pais di mundo a pensa y por a prepara pe, el a declara.
Pa esunnan cu ainda tin trabao, Pontilius su conseho ta pa nan keda humilde pa realisa e trabao cu mester realisa, ya sea haci limpi, verf scol, etc.. cualkier actividad laboral cu nan por cobra y haya algo di salario na kinsena of fin di luna. E grado di humildad tambe mester t’ey. “No pasobra mi tabata traha waiter y awor mi mester haci limpi p.e. cura di scol, mi no ta hacie. E parti di disponibilidad mester t’ey”, el a bisa.
Considerando cu Aruba ta un isla chikito cu ta depende casi exclusivamente di turismo e impacto ta dramatico. Pero e ta haya cu e echo aki no ta duna niun derecho na niun dunado di trabao di actua di un forma como si fuera cu leynan ya no ta existi mas. “Simplemente esey no por. E leynan no ta permiti esaki!”, el a bisa categoricamente.
