Un dia despues cu e trahadonan di limpiesa na servicio di SKOA y afilia na sindicato SEPPA a bin cu un accion di protesta, nan a haya for di gobierno un contesta tentativo tocante nan preocupacion.

Ta asina cu diahuebs ultimo e trahadonan a bin cu un accion di protesta organisa pa sindicato SEPPA, caminda nan a entrega un carta of manifiesto na minister di Labor, Glenbert Croes, unda nan a pidi claridad y un decision definitivo. Ya cu nan ta sinti cu nan trabao ta na peliger. Si nan no ta haya un contesta satisfactorio e accion aki lo sigui escala.

Comision

Bon Dia Aruba a tuma contacto cu e lider sindical di SEPPA, Magali Brito kende a declara cu minister Glenbert Croes a informa cu conseho di minister a bay di acuerdo cu e proposicion di Mediador di Gobierno pa instala un comision chikito.

E comision aki lo wordo lidera pa Mediador di Gobierno, Sr. Anselmo Pontilius, y tambe e lo conta cu participacion di representantenan di e bureau di e minister di Labor, representante di e bureau di Minister President, Departamento di Recurso Humano (DRH) y SEPPA. E sindicato a pidi pa un representante di SKOA mester ta aden di e comision aki. “Nos no por ta papiando di SKOA su trahadonan, y nan no sa kico ta sosodiendo,” Brito a declara.

E comision aki su tarea lo ta pa den corto plaso -den termino di dos siman- lo por bin cu posibel solucion na e problema cu e trahadonan ta aden. Segun Brito, e punto di salida di gobierno ta cu niun di e 91 werksternan no lo perde trabao.

Mientras di banda di SEPPA e punto di salida den e discusion aki ta con nan ta bay soluciona loke supuestamente pa minister di Enseñansa, Armando Lampe, lo a causa e problema cu e werksternan. Kiermen e MB di 2015 caminda ex minister, Michelle Hooyboer, e tempo aya a regla e subsidio cu ta cubri tur e beneficionan secundario cu e trahadonan di limpiesa na servicio di SKOA ta gosa di dje awendia.

Minister Lampe su posicion ta cu SKOA no mester a paga e beneficionan y condicionnan secundario cu e trahadonan aki tin. Teniendo na cuenta cu e mandatario su posicion, SKOA a yega di papia cu e trahadonan caminda e fundacion a splica nan e panorama laboral y su efecto pa nan. Eventualmente SKOA no ta mira otro opcion cu kita nan for di trabou, si gobierno no bin cu otro desaroyo.

Minister Lampe a yega di bisa cu SKOA debe gobierno placa cu nan a duna di mas. Den esaki ta wordo papia di miyones. P’esey pa SEPPA e posicion di minister Lampe, caminda e ta haya cu e procedura di SKOA cu e trahadonan di limpiesa no tabata corecto, y awor gobierno ta cobrando e suma miyonario aki na SKOA, ta e punto di salida fundamental di e sindicato.

Alternativa

Sinembargo ya caba a wordo formula algun idea. Un di nan ta esun cu minister Glenbert Croes a bin cune como opcion den caso cu ta keda insisti cu ta kita e trahadonan aki di trabao. Kiermen teniendo na cuenta cu den e caso aki e punto di salida di gobierno ta pa niun di e 91 trahadonan aki ta perde trabao, e ora ey nan ta mira te hasta como opcion pa Traimerdia cu recientemente a bira un departamento di gobierno, tuma e trahadonan aki.

Un argumento ta cu Traimerdia tambe lo bin cu e parti di “Bon Tardi.” E proyecto “Bon Tardi” ta busca atende cu e hobennan te cu 18 aña. Si den caso cu gobierno lo opta pa e alternativa aki, sigur e lo bira un punto di discusion, mirando e palabracion y acuerdo haci cu Hulanda, caminda Hulanda ta presiona pa pais Aruba baha gasto di aparato publico.

SEPPA ta spera cu aki dos siman e trabao asigna na e comision por bin cla, y pa nan bin cu alternativanan pa asina gobierno por bin cu un decision mas rapido cu ta posibel pa bin cu un solucion definitivo pa e trahadonan di limpiesa na servicio di SKOA.