(ElNacional) – Nicolas Maduro a afirma diamars cu e economia Venezolano a crece ariba di dos digito, sin precisa e cifra, durante e prome trimester di 2022.
“Venezuela a experimenta un crecemento durante e prome trimester di aña 2022 ariba di dos digito. E ta un noticia positivo pasobra manera e boletin di inteligencia economico cu expertonan economico ta produci ta bisa, e indicadornan tur ta mustrando un mehoracion”, e mandatario a expresa den un transmision via Facebook live.
Maduro a agrega cu e stabilidad di e sistema cambiario y su sostenibilidad, e caida di inflacion y e reproduccion di credito bancario ta un aspecto cu a yuda cu e crecemento economico.
Dia 16 di mei ultimo, e Observatorio Venezolano di Finanzas (OVF), un entidad independiente integra pa expertonan economico, a afirma cu e economia di Venezuela a crece cu un 7.8% durante e prome trimester di 2022 compara cu e mesun periodo den aña 2021, debi na e aumento di e actividad petrolero.
Segun e datonan di OVF, e sector petrolero a registra durante e prome tres lunanan di aña un aumento di 41.7% compara cu e prome trimester di 2021.
E informacion ta respalda pa datonan di e Organisacion di Paisnan Exportador di Petroleo (OPEP), cu ta mustra un aumento di produccion di 41% ora cu compara ambos trimester, pasando di un promedio di 533 mil bari pa dia pa 756 mil.
Di otro banda e actividad promedio di e sector financiero a reduci cu 7.9% den e prome tres lunanan di 2022 compara cu e prome trimester di 2021, mientras cu e sector publico a cay cu 37.5%, semper segun OVF.
OVF ta calcula cu si mantene e tendencia aki di crecemento, y cu un nivel di produccion petrolero aproxima di 600 mil bari pa dia, e producto interno bruto (PIB) lo crece cerca di 81% e aña aki.
