Formacion di gobierno ta keda un topico di interes general pa comunidad, y uno di preocupacion alabes. A pesar cu algun dia atras tabatin un impasse den e negociacionnan entre partido AVP y Futuro, segun lider di partido AVP Mike Eman, formacion ta andando atrobe di un forma positivo.

Dia 23 di januari a circula informacion den medio como riba rednan social cu e proceso di formacion di gobierno entre partido AVP y partido Futuro a tranca y cu partido AVP lo a duna Futuro un ultimatum di 48 ora pa recapacita.

Esaki a grega a e preocupacion cu ta reina den comunidad pa e motibo di falta di informacion y silencio cu tin pa loke ta trata e proceso di negociacion.

A traves di un publicacion riba su pagina di Facebook oficial Gerlien Croes a indica cu partido Futuro no a ricibi ningun ultimatum for di partido AVP, manera cu a ser publica den medio y riba rednan social.

“Dialuna ultimo (20 januari) Futuro a tene, un bes mas, reunion oficial fisico cu e ekipo di negociacion di partido AVP; y entre diamars cu diaranson tabatin comunicacion telefonico. Partido AVP y/of Sr. Eman, te cu awor, na ningun momento a informa partido Futuro of mi persona, como lider di partido y co-formado, cu nan a presenta un ultimatum na partido Futuro pa cu e negociacionnan cu ta andando, ni tampoco a confirma cu oficialmente tin un impasse,” Croes a scirbi den su publicacion.

Mas informacion tocante e situacion no a bira conoci, te recien cu lider di AVP, Mike Eman a bisa cu e e proceso di formacion ta andando atrobe di un forma positivo.

Segun informacion cu e noticiero local Noticia Cla a publica, Eman a bisa cu “combersacionnan ta andando atrobe, positivamente.”

Segun e portal a indica Eman tambe a splica kico tabata e motibo pa e impasse entre e partidonan. El a splica cu e impasse a bin door di deseonan igual pa e mesun carteranan y reparticion di e carteranan aki. Pues ambos partido tabata kier e mesun cartera- y ministerionan, cual no ta posibel y esaki ta loke a trece e impasse.

Partido Futuro kier un gobierno cu siete minister y di e siete aki nan tabata kier tres minister, locual AVP no tabata di acuerdo cune y e ora a sugeri pa un reparticion di dos minister pa Futuro y cinco pa AVP, teniendo na cuenta e cantidad di asiento cu cada partido a saca.

Manera ya caba ta conoci na final di december partido AVP y Futuro a firma un declaracion di boluntad pa forma siguiente gobierno. Informador di e proceso, Sra. Tisa LaSorte a presenta su relato final na Su Excelencia Gobernador di Aruba Alfonso Boekhoudt, den cual ta conclui cu partidonan AVP y Futuro conhuntamente kier forma un coalicion.

A base di su resultadonan despues di su proceso di investigacion tocante cual opcion tin pa forma un gabinete y e reunionnan cu lidernan di partido cu a ricibi asiento durante eleccion parlamentario di dia 6 di december di ultimo, LaSorte a conclui cu e dos partido aki, Futuro y AVP ta dispuesto pa forma un coalicion y a firma un declaracion di boluntad.

Despues di esaki, dia 14 di januari Gobernador di Aruba a apunta oficialmente Gerlien Croes y Mike Eman como formador y a encarga nan cu e formacion di un gabinete stabiel cu tin confiansa di e fraccionnan di AVP y Futuro den Parlamento y cu ta consisti di personanan cu ta dispuesto y capaz pa implementa un maneho financiero-economico solido, cu atencion pa costo di bida na Aruba.

Parti di e encargo di formacion ta trahamento di un acuerdo di gobernacion entre AVP y Futuro y un reparticion di cartera denter di e gabinete nobo. Finalmente, e eligibilidad di candidatonan pa e funcion di minister y di minister plenipotenciario mester wordo evalua previamente a base di e exigencianan y proceduranan stipula den e “Landsverordening integriteit ministers”.

Ya casi ta bay cumpli tres siman desde cu Eman y Croes a ser encarga cu e tarea aki ya cuminsa cu e proceso di negociacion. Durante e tres siman aki tabatin un silencio pa loke ta e proceso di negociacion di formacion di gobierno, algo cu tanto ciudadanonan como tambe politiconan a tuma nota di dje y a expresa nan preocupacion pa cu esaki.

Mas detaye di e proceso di formacion no ta conoci y comunidad di Aruba tin expectativa halto pa loke ta e formacion di e gobierno nobo aki. E falta di informacion ta crea incertidumbre pa loke ta e futuro di e formacion di gobierno.

Algun ciudadano tambe ta cuestiona si acaso e dos partido yega na un acuerdo y forma un coalicion, con fuerte e coalicion aki lo ta en berdad y con largo e lo dura si for di inicio caba tin problema di comunicacion, cual ta un base principal den un negociacion asina importante, y falta di tumamento di decision.