Segun lider di fraccion di MEP, Rocco Tjon: ‘Ta respeta decision di Parlamentario Lejuez, pero ta contra di motibonan’

Como lider di fraccion di MEP, Parlamentario Rocco Tjon, no ta reconoce nan mes den e potencianan cu nan ex colega di fraccion, Daphne Lejuez, a trece dilanti como argumento pa bira parlamentario independiente.

Te hasta el a bisa cu nan ta lamenta como fraccion y partido cierto expresion cu Lejuez a haci durante su conferencia di prensa haci na BAZ-RRR Galeria & Brasserie. Nan ta rechasa esaki no solamente como fraccion, sino como partido tambe.

“Nos por conclui awe cu interes personal a vence interes general y bienestar di pais Aruba”, asina lider di fraccion di MEP a bisa.

Tjon a refuta locual Parlamentario Lejuez a indica, cu parlamentarionan ta wordo silencia, intimida of presiona pa tuma cualkier decision. El a bisa cu esaki no ta cuadra den e filosofia di un partido social-democrata cu ta e signatura di partido MEP. El a agrega cu nan posicion independiente ta wordo expresa por ehempel ora cu e ley di supervision financiero CAft a wordo trata, caminda fraccion di MEP a presenta cambio of amienda riba e ley aki presenta pa gobierno. El a menciona e ehempel aki pa refuta e ponencia di Lejuez, cu e miembronan di e fraccion aki ta wordo silencia, intimida of presiona pa bay un cierto direccion.

Segun Tjon, den nan partido ta biba democracia. P’esey nan a respeta e decision tambe di nan colega di fraccion, Lejuez. Sinembargo el a expresa cu aunke nan ta respeta su decision, nan no ta di acuerdo cu su motibonan pa bira independiente.

Tjon a bisa cu como lider di fraccion, dos siman pasa el a hiba un combersacion cu Lejuez na momento cu el a splica su puntonan di preocupacion riba e ley di Serlimar riba Facebook. El a tilda esaki como un combersacion ‘sumamente positivo.’ Un combersacion cu e no a sinti niun indicacion di Lejuez cu e no ta sinti su mes bon mas den e partido MEP y tampoco den nan fraccion. Al contrario, te hasta Lejuez a bis’e cu lo bay lag’e sa como lider di fraccion, cual ta e ultimo tres puntonan di preocupacion riba e ley di Serlimar.

E ta kere cu e motibo real di e decision di Lejuez tin di haci cu diabierna ultimo den Parlamento, den un reunion di Comision Central, un decision a wordo tuma contra e Parlamentario di AVP relaciona cu e caso Avestruz. Eynan el a expresa cu ta diferencia di opinion di e fraccion di MEP. Ya cu e si ta haya bon cu e ex minister y parlamentario por representa pais Aruba den Parlatino. E mesun dia ey, Lejuez a sali for di e chat group cu nan tin pa comunica cu otro tambe, Tjon a bisa.

Tjon como lider di fraccion aki ta lamenta e posicion aki, pero mas ta lamenta cu Lejuez ta pretende di ta para pa politica nobo y transparente. Pero tambe nan a lamenta cu en bes di cumpli loke el a priminti di informa nan riba cualkier decision cu e lo tuma, el a dicidi di bay den media di comunicacion pa nan por a tuma nota di su decision.

“Mi ta kere cu sigur esaki no por ta parti di un politica nobo, un politica transparente, profesional, y honestidad cu mester para p’e”, e lider di fraccion di MEP a bisa.