Lider di fraccion di MEP, Rocco Tjon no ta di opinion cu Sr. Juan Thijsen mester a duna honor na su mes y entrega su funcion como presidente di Staten. “Ami no ta di opinion cu Sr. Thijsen mester retira. Pa nos e no ta un topico di discusion pa bisa bo honestamente,” el a declara na Bon Dia Aruba

Credibilidad

Otro miembronan di e fraccion di MEP a yega di retira como parlamentario pa algun infraccion cometi, te hasta por ta di menos caliber di responsabilidad pa loke ta trata integridad di nos organo legislativo. Sinembargo lider di fraccion di MEP ta convenci cu henter asunto aki ta un wega politico cu opositornan politico ta trata di trece pa dilanti aworaki cu Sr. Thijsen lo mester a retira.

Sr. Tjon a trece como ehempel pa ilustra e situacion di presidente di Staten cu si ora bo tin un hues, y hues ta tuma un decision, y si bo no ta di acuerdo cu e decision bo ta bay apela cu tres diferente hues, caminda nan ta interpreta e caso diferente. “Esey no kiermen cu e prome hues mester retira y e no mag ta hues mas,” el expresa.

Tampoco e no ta haya cu e reunion di ayera pa trata e presupuesto supletorio 2020 por a perde credibilidad pa e hecho cu Sr. Thijsen a presidi e reunion aki. Esaki despues di e reunion di 15 di october ultimo cu a wordo yama pa trata e topico di spearfishing y cu a culmina cu e votacion y aprobacion di tres mocion dor di presidente di Staten mes, entre nan un mocion di desconfiansa contra ex minister Lopez-Tromp, cu despues e mesun Sr. Thijsen a declara nan como nulo of invalido.

Parlamentario Tjon a indica cu Sr. Thijsen tin 3 aña cu ta presidi instituto Parlamento, y e ta kere cu tin un cambio grandi den e manera con reunionnan ta wordo dirigi. “Pues mi no ta kere cu e no ta afecta nada pa e reunion di awe”, e lider di fraccion di MEP a declara na Bon Dia Aruba ayera.

Interpretacion

Parlamentario Tjon ta haya cu e punto central di henter e discusion aki tabata trata di interpretacion di un regla of ley. Tambe el a agrega cu tin hopi hurista cu a bay di acuerdo cu interpretacion di Sr. Thijsen. Sinembargo presidente di Parlamento a tuma un decision pa laga interes general prevalece.

 

Parlamentario Tjon a bisa cu den su opinion e situacion cu a surgi no ta kita Sr. Juan Thijsen su credibilidad como presidente di Staten. El a splica cu dos cos mester separa for di otro. Na prome luga Sr. Thijsen a mustra grandesa dor di pone su interpretacion di e regla un banda pa laga interes general prevalece. Esaki a base di articulo 6 di Reglamento di ordo cu ta indica cu ora cu Parlamento vota entre otro riba mocionnan, es decir e decision cu Parlamento tuma, ta presidente di Parlamento ta aprob’e. Tambe presidente di Parlamento ta ‘bied aan’ e mocionnan aki na gobierno. A base di e articulo aki Sr. Thijsen a tuma e mocionnan bek y declara nan nulo.

Parlamentario Tjon a bisa cu nan ta compronde e decision di Sr. Thijsen, y como fraccion tambe nan ta para tras di interpretacion di Sr. Thijsen, y tambe nan ta para tras di e decision di laga su interpretacion un banda pa asina interes general por prevalece.

El a referi cu Sr. Thijsen a yega di splica cu e decision aki a causa conmocion den nos comunidad y ta keda reina un discusion. Y esey tabata motibo dicon Sr. Thijsen a dicidi pa bienestar general y pa instituto Parlamento, pone su interpretacion un banda y ‘laga e interpretacion otro prevalece.’

Un aspecto cu e ta considera importante ta cu nan a cuminsa cuestiona despues e declaracion di e mocionnan nulo. Sr. Tjon a declara cu unabes bo ta tuma un decision, e tin consecuencianan pa e resto di e reunion. Cu esaki e kiermen cu den e reunion di 15 di october tabatin mocionnan cu a wordo entrega. Pues e ta haya cu e mocionnan aki toch tabata valido, ya cu na momento cu nan a wordo entrega, nan a cumpli cu tur e reglanan. Sinembargo si ta declara aworaki cu e votacion ta nulo, obviamente e aprobacion di e mocionnan tambe ta nulo, ya cu e tin un consecuencia.

Oposicion

Parlamentario Richard Arends di fraccion di AVP tabata masha cauteloso pa referi si presidente di Staten berdaderamente ta gosa di henter credibilidad di Parlamento pa presidi un reunion di presupuesto complementario.

El a considera e reunion aki sumamente importante y independiente di e discusion causa rond di presidente di Staten. El a declara na Bon Dia Aruba: “Nos a cera e capitulo di asunto di e mocionnan.” El a agrega cu nan a mantene un discrecion hopi grandi durante e ultimo simannan pa loke ta trata interpretacion di e legalidad. E ta haya cu e reunion di ayera tabata gewoon un reunion regular cu nan ta sigui atende.

Encuanto si Sr. Juan Thijsen mester tuma honor na su mes y entrega su posicion como presidente di Parlamento. Parlamentario Arends a declara cu “esaki ta un conclusion cu e mes mester tuma.” Pues e ta kere cu referiendo na Sr. Thijsen su propio conclusion, kico e ta tuma of no laga di tuma riba su retiro, esey nan ta lage na Sr. Thijsen mes.

El a añadi cu nan como fraccion di AVP ta sigui cu nan trabao. Ayera mainta nan a bay atende e reunion riba presupuesto supletorio. “Nos t’ey pa representa pueblo. Nos ta e partido di mas grandi den Parlamento cu 9 asiento, y nos ta e partido grandi tambe den oposicion,” el a expresa.