Siman pasa un video a circula riba rednan social cu a mustra con trahadonan di un cas funerario a purba di deshaci di un caha di morto. E acto aki a lanta algun inkietud.

Esta si esaki tabata e procedura mas higienico y corecto pa haci’e den cuadro di salubridad publico. Sin lubida cu ta trata di un caha di morto cu tabatin restonan pa varios aña cera den graf di un difunto den dje.

E manera con e trahadonan a lucha pa purba di acomoda e caha di morto den e container a wordo cuestiona hopi. Si esaki tabata e procedura mas corecto pa benta un caha di morto bashi cu a wordo uza caba. Nan a gewoon tir’e den un baki of container di sushi, manera si ta trata di un sushi normal.

Hefe di Dienst Warenkeuring en Hygiene, Yvette Geerman a declara na Bon Dia Aruba cu segun ley, un graf of kelder no por wordo habri prome cu 3 aña. Despues di tres aña ainda nan personal ta supervisa con e resto cu ta den e caha di morto ta. Si el a descompone completo of no. Den caso cu ainda e no a descompone completo, e famia mester tuma e decision di cer’e bek of crema e resto. Tur esaki ta tuma luga den presencia di un controlado publico.

Relaciona cu e caha di morto cu a wordo benta den un container, el a bisa cu e tabata bashi, y cu no tabatin niun resto humano den dje. Tur esaki a sosode despues cu e cas funerario a cumpli -segun ley- cu tur e proceso di saca e restonan humano. Sinembargo Geerman a declara na e matutino aki cu como departamento nan ta trahando riba un procedura of maneho tocante e forma corecto relaciona cu tur e desperdicionan di e tipo di trabao aki. Entre otro con pa deshaci di e caha di morto, prome cu e ta yega na e luga concerni, entre otro e dump.

Maneho

Manera tur hende sa e dump ta den su proceso tambe con lo para cune. Actualmente departamento di Salubridad Publico (DVG) ta bezig cu un comision interno, hunto cu otro departamento y partnernan externo cu ta trahando riba un maneho di desperdicio en general, esaki ta inclui e parti di funeraria tambe, Geerman a bisa.

Pero e maneho ainda no ta cla. Tin ley anticua riba e tereno aki cu mester update nan. P’esey nan ta trahado riba proceduranan pa modernisa y adapt’e na e sistema actual. Con leu nan ta? Segun Geerman, ya caba nan tin hopi punto den concepto cla, y no ta keda mucho pa nan keda concretisa. E ta den su fase final, el a laga sa.

Den caso aki nos ta papiando di un caha di morto cu tabatin resto humano den dje, y cu por a nifica un risico cu nan ta consciente di parti di sanidad. P’esey nan ta bezig riba un maneho. Pero e ta un trabao grandi, ya cu tin diferente tipo di sushedad y no tur ta bayendo di e forma corecto. P’esey nan ta trahando riba un maneho pa tur cos mester bay den forma corecto. E meta tras di esaki ta pa bin cu un maneho sostenibel.

Supervision

El a añadi cu tur sacamento di resto ta sosode bao supervision di Departamento di Salubridad Publico (DVG). Sin supervision di nan, un graf of kelder no ta wordo habri, sin presencia di un trahado di nan departamento, y nan ta traha y supervisa conforme ley.

Na momento cu e peticion ta drenta di e cas funerario pa sacamento di resto di famianan, normalmente e ta sosode na momento cu tin otro entiero, y nan mester haci uzo di e graf of kelder. E funeraria mes ta acerca e departamento aki y a base di cita ta wordo coordina pa un trahado di DVG ta presente pa habrimento di e graf.

Pa loke ta e caso specifico cu a tuma luga siman pasa, y cu DVG a referi na dje pa medio di un comunicado di prensa, Geerman a splica cu nan a cumpli cu e procedura corecto.

Den e caso particular aki cu a keda divulga den medionan di comunicacion, e famia a pidi pa habri e graf cumpliendo cu tur rekisito. Pero e curpa no tabata full descompuesto y nan a dicidi di crem’e.

E resto a wordo poni den un body bag pa medio di e funeraria cu a transporte den su mesun auto cu nan tin pa haci e trabao aki. Tur esaki bao supervision di personal di DVG, te cu e resto a yega na e funeraria, segun Geerman. E cas funerario a sigui cu e proceso cu mester haci cu e resto di curpa pa crem’e.

Pa local ta trata e caha di morto tin personal di e cas funerario mes cu ta haci e trabao pa atende tur e sushedad cu mester wordo benta afo, y nan tin nan containernan special. Eynan nan ta deposita tur nan desperdicionan.