Segun Jan van Nes di Aruba Food & Beverage Association (AFBA): 2020 ta un aña den nos historia mundial: “devastador”

Un di e sectornan di nos industria turistico hopi golpia pa causa di e pandemia, ta e sector conoci como horeca. Jan van Nes di Aruba Food & Beverage Association (AFBA) a duna un panorama general riba e situacion cu e sector economico aki a conoce durante 2020.

E ta corda cu ora e aña aki a habri caminda tur hende feliz a cende nan tradicional pagara pa marca cu un aña bieu cu a keda atras y otro nobo a inicia, nan a premira ‘un aña bunita.’

Sr. Van Nes a bisa cu e cifra pa 2020 tabata mustra uno hopi prometedor marca pa cierto acontecimento. Un di nan por ehempel tabatin di haci cu e hendenan cu a casa dia 20 di februari 2020. E tipo di acontecimento aki a trece un aire di speransa pa aña 2020 cu ta clausurando.

Pero awor Sr. Van Nes ta kere cu nos ta den un momento cu tur hende cu ta despidiendo di e aña aki, ta contento cu nos por lubida 2020. “Pasobra e ta un aña den nos historia mundial tabata devastador,” el a declara na Bon Dia Aruba.

Aña 2020 tabata devastador pa salud publico, economia, desempleo na nivel record y negoshinan cu a cera. Tur e aspectonan aki ta haci cu ‘2020 ta un aña cu nos kier lubida lo mas pronto posibel.’ E cambio di aña ta trece cune – segun Sr. Van Nes – cu nos lo premira cu 2021 ta un aña di optimismo.

E echo cu tin un vacuna caba cu ta wordo uza ta contribui definitivamente na e ambiente di speransa aki. Vooral den e spirito cu e virus aki ta pik ainda masha hopi den nos principal mercado turistico cu ta Merca. Pero tambe nos por observa piknan hopi grandi cu a lock down na Europa, manera na Alemania, Hulanda (casi lock down), Belgica y Francia. A pesar di e situacion aki e ta mira un luz den e echo cu tin un vacuna. Nan a cuminsa cu e proceso di aplica e vacuna y e ta kere cu e proceso ta uno prometedor.

Igualmente ta un señal positivo cu Merca cu ta nos mercado principal, toch nan hendenan ta biniendo Aruba pa vakantie. Pasobra ta resulta cu nos isla ta hopi mas safe na e momento aki cu Merca mes.

“Esey ta algo cu mi ta kere cu pa Pasco nos lo premira,” el a laga sa. Esaki ta haci cu e sector aki representa dor di AFBA ta un poco optimista cu nan lo haya un parti husto den e temporada aki. No un 90% pero talbes mita di dje pa full e temporada di december.