Segun informacion no oficial: Abstencion tabata grandi den eleccion Dominicano na Aruba

Ayera eleccion general di Republica Dominicana a bira e prome eleccion cu a wordo realisa cu pandemia den nos region. E pueblo Dominicano a vota pa eligi presidente y diputadonan.

Segun encuestanan e dos candidatonan presidencial mas popular tabata Luis Abinader, kende ta lider di Partido Revolucionario Moderno (PRM) y Gonzalo Castillo di Partido de la Liberacion Dominicana (PLD). Si niun di e candidatonan ta haya un mayoria absoluto di mas cu e mita di e total di votonan deposita lo tin un di dos buelta e luna aki mes.

Na Aruba e eleccion aki a tuma luga na Centro di Bario Playa Pabao, caminda 2138 Dominicano tabata registra den nan censo of padron electoral di JCE. Sinembargo un gran mayoria di nan a abstene di vota. No ta conoci ainda e causa di un abstencion di casi un 50%, segun informacion no oficial.

E votacion a cera 5or atardi pa asina nan cuminsa di biaha cu e proceso di contamento di e votonan. Pero te ainda pa 8or anochi no tabatin un cifra total conoci oficialmente di cuanto votonan a wordo deposita. Tampoco riba e candidatonan of partidonan cu a logra mayoria di votonan entre e comunidad Dominicano na Aruba.

Gladys Santana ta representante di Junta Central Electoral (JCE). E ta e principal autoridad electoral di eleccion Dominicano na Aruba. El a declara na Bon Dia Aruba cu e proceso democratico aki a wordo realisa sin niun incidente, y teniendo na cuenta tur regla di higiena contra Covid. Un existencia tabata entre otro cu tur hende mester a bisti mask na momento di vota. Santana a bisa cu cada ciudadanonan a identifica nan mes cu nan cedula dilanti e mesa di votacion y cumpliendo tur protocol di higiena.

El a declara cu un inkietud a presenta ora cu varios ciudadano a bin cu intencion di haci uzo di nan derecho di vota. Den eleccion pasa JCE a emiti un resolucion cu a permiti cu tur ciudadano Dominicano cu no tabata registra den e censo electoral di JCE por a eherce e derecho aki. Solamente nan tabatin mester di un cedula valido. Pero e biaha aki JCE no a emiti e mesun resolucion aki. “Algun ciudadano a confia cu e biaha lo ta mescos, y nan no a registra den eleccion aki,” segun Santana.

Santana a bisa na e matutino aki cu mester warda e resultado di eleccion aki. Si niun di e candidatonan no ta logra e mayoria lo tin un di dos buelta cu lo tuma luga dia 26 di juli venidero.