Como parti di su rapport riba Consulta Articulo IV pa Aruba, Fondo Monetario Internacional (IMF) a identifica oportunidadnan pa reforma den mercado laboral cu mira pa crecemento economico. Den esaki, a identifica igualdad di genero como un area cu tin potencial.
Segun IMF, crea un ambiente pa utilisa completamente e potencial di e forsa laboral femenino ta clave pa crecemento inclusivo na Aruba. Aruba a experimenta crecemento modera den ultimo dos decada, reteni pa e reduccion den productividad di factor total (TFP).
E continuacion di ‘brain drain’ y e embehecemento di e poblacion ta sirbi como un forsa contra e crecemento. Un contribucion mas halto di hende muher den forsa laboral lo yuda surpasa e reto door di aumenta input y productividad di labor y asina permiti pa crecemento di un manera inclusivo.
Hende muhe na Aruba tin un tasa mas halto di participacion secundario cu homber, pero gap di genero den participacion den forsa laboral y den salario ta permanece. Hende muhe tin bon acceso na educacion na Aruba, pero participacion femenino den forsa laboral ta apenas 60 porciento desde mita di añanan 2000 (aunke e diferencia entre participacion femenino y masculino ta den linea cu paisnan comparable internacional, manera Canada.)
Hende muhe tipicamente ta sub-representa den cierto ramo (specialmente STEM) loke ta resulta den salarionan averahe mas abao cu pa hende homber. Aruba sinembargo si tin un proporcion mas grandi di hende muhe den posicionnan di liderazgo cu paisnan comparable.
Autoridadnan local, segun IMF, ta haciendo esfuersonan pa mas progreso den igualdad di genero. Nan a lansa e Politica Nacional di Genero pa Aruba na mei di 2022, pa crea un ambiente cu ta permiti igualdad di genero y empoderamento di hende muhe na tur sector di sociedad y economia Arubano. E prioridad ta pa aumenta oportunidadnan di trabao y empresarial pa hende muhe. Iniciativanan strategico tambe ta enfoca riba mehoracion di proteccion social y acceso na finanzas y educacion.
Sinembargo, ta destaca cu mester mas colecta di data y analisis pa determina kico ta impulsa posible desigualdad di genero den mercado laboral. E gap observa den salario di e generonan por ta atribui na diferente causa, manera normanan socio-cultural, e peso di cuido sin pago, falta di oportunidadnan di trabao, habilidadnan desigual y prehuicio di genero. Usando micro-data riba caracteristicanan di forsa laboral pa analisa kico ta determina e gap por yuda determina kico ta impulsa e prehuicionan potencial di genero den e sistema y conduci na un miho diseño di politica. Esaki por inclui intervencionnan pa curasha educacion STEM pa hende muhe, reduci e sancion fiscal pa segundo entrada, introduci un Credito Tributario pa Ingreso di Trabao pa curasha participacion, y duna sosten pa cuido di mucha.
