ORANJESTAD – Repetidamente gobierno Hulandes a adverti gobierno di Aruba cu mester haci mas pura cu reforma di ley di impuesto, pa motibo cu de lo contrario, Union Europeo lo pone nos pais riba e lista preto di ‘paraiso di belasting’.
Segun un relato di koninkrijkrelaties.nu, secretario di estado, Menno Snel, despues di e reunion na Brussels unda a yega na un acuerdo tocante un lista preto, unda Aruba su nomber tambe ta poni, a declara cu ‘nos a adverti Aruba y Corsou’, agregando cu ‘mi a bisa cu e lista ta wordo traha a base di criterio obhetivo, y cu no tin consideracion politico. Hende tabata sa kico nan mester a haci. Aruba no a logra haci esey na tempo’.
Sinembargo, mirando cu Aruba ta atrasa, y no cu a falta di cumpli, tin speransa cu gabinete Wever-Croes logra prepara e ley y haya esaki aproba pa Staten a corto plaso. “E ora ey, talbes Aruba por sali di e lista preto na fin di mei.”
Comentario di minister di finanza
Minister di finanza, Xiomara Ruiz-Maduro, kende actualmente ta den exterior, a comenta a traves di su vocero den medionan di comunicacion tocante e situacion aki, splicando cu e ley actualmente ta na parlamento, pero e no a wordo trata ainda. “Aruba su problema den esaki ta e falta di capacidad pa por traha ley”, Wever-Croes a splica na e noticiero masnoticia. “Nos no tin suficiente hende pa traha ley na Aruba y door di cu tin proyecto grandi a tuma luga recientemente (e.o. presupuesto 2019, reforma fiscal), ta tuma hopi capacidad huridico cune. Esey a pone cu algun proyecto a keda sin wordo finalisa na tempo.”
Sinembargo, e mandatario tambe a menciona e hecho cu tin posibilidad di sali for di e lista preto na fin di mei, si e ley wordo finalisa. “Den e caso aki, nos ta spera di por conta cu e cooperacion di parlamento pa asina aki e ley por pasa pronto, y asina nos por cumpli y manda e informacion (pa Union Europeo)”, y asina Aruba sali for di e lista preto.
