Francisco Figaroa, ken siman pasa a keda deteni ‘sin motibo’, segun loke el a declara pa Bon Dia Aruba, tambe a expresa cu ‘Polis a viola mi derecho fundamental y esey ta abuso di poder’.

El a splica cu diaranson ultimo 1 di juli, den oranan di anochi casi 11or, el a pidi un cuminda na Lekker restaurant na Noord. Na momento cu e tabata saliendo for di e luga, polis a yega na parkinglot. E momento ey Figaroa a bisa nan “net na tempo, ta 11or”. El a cana bay direccion di su auto pa coy su telefon y avisa su casa cu e lo bay documenta e ciere di Lekker Restaurant. Pa su sorpresa, el a keda deteni, sin haya sa e motibo di su detencion, pa loke el a puntra pa e agente: “kico ta e hecho castigabel cu mi persona a comete?”

Diasabra ultimo, Polis a busca Figaroa na su cas pa e firma su zwijgrecht despues di tres dia di su detencion, pa purba di oblig’e pa e firma su zwijgrecht. Segun e agente di polis ‘G’ a sigura, Figaroa a lubida di firma na e momento cu el a sali di warda di polis. Tambe e mesun agente a admiti cu nan a viola su derecho fundamental den warda di polis di Shaba, segun un grabacion cu Bon Dia Aruba mes tin den su poder y cu por scucha riba nos website, bondia.com.

Figaroa a duna Bon Dia Aruba su declaracion oficial cu el a manda pa alto comisario di polis Vanessa Tjon Kock dia 3 di juli; y 4 di juli el a wordo entrega oficialmente na warda di polis di Santa Cruz.

Di mesun manera, el a duna di conoce cu el a keda sorprendi ora el a haya un cantidad di yamada di e number di telefon di warda di Shaba. E mesun dia Figaroa a comenta cu dos agente di polis di un manera desespera pa haya Figaroa a yega na Coco Loco Bar, na unda Figaroa na e momento ey tabata comparti cu algun amigonan.

El a manifesta cu pa motibo di su siguridad, y tambe cu e no ta haya normal pa firma un documento policial cu por perhudica su persona den corte si e caso mester bin dilanti, el a graba e combersacion cu e agente di polis -cu redaccion a dicidi di yam’e agente ‘G’- pa motibo cu el a sigura cu e no tin suficiente confiansa di con e proceso di su detencion a bay. “Semper un rapport policial ta eenzijdig”, el a afirma. Tambe cu polis a cer’e prome sin lesa su derechonan y sin bisa e motibo pakico nan a detene.

Ora Figaroa tabata deteni, el a conta cu nan tabata kier pone su persona firma un documento den scuridad den e cel sin luz. “Esaki ta bay contra tur derecho fundamental”, Figaroa a declara.

Den e combersacion cu a wordo graba, Figaroa a puntra pa e otro agente cu tabata compaña agente ‘G’, pa eticamente e por distancia su mes di e combersacion aki. Na comienso di e combersacion e a agente ‘G’ a bisa: “Wak, bo no mester tuma mi na malo paso a mi no sa kico a pasa bo, esey ta e prome cos.” Pa loke Figaroa a bisa agente ‘G’: “Ruman, nan a viola mi derecho fundamental” y agente ‘G’ a sigura: “Mi sa! Ta berdad, mi sa esey”. Un minuut y mey despues cu e combersacion a cuminsa cu agente ‘G’ di warda di polis di Shaba, el a admiti cu nan a viola Figaroa su derechonan.

Basta minuut despues, Figaroa a haci e mesun pregunta pa agente ‘G’ : “Pero, ruman scucha kico mi kier bisa bo, honestamente, nan a viola mi grondrechten?” Pa loke agente ‘G’ a bolbe confirma “bo tin rason”.

Figaroa a trece dilanti cu e grabacion ta contene mas di 20 minuut di combersacion cu agente ‘G’ den un luga ameno. “Loke tabata falta ta koffie cu cuki”, el a señala. Tambe a menciona cu e grabacion aki ta sostene e carta oficial cu a bay pa alto comisario Tjon Kock pa cual el a pidi pa saca e grabacion di sistema di camara di warda di polis di Shaba, pa no solamente proba su inocencia, sino cu tambe proba con a viola su derechonan fundamental.

Pa finalisa, Figaroa a comenta cu e no ta desea cu otro persona lo biba e mesun situacion aki cu el a pasa, e ta conseha pa tur ciudadano di Aruba pa haya sa nan derecho y nan obligacion den e isla dushi aki cu ta yama Aruba.

Click aki pa scucha tur e voicenotes: https://drive.google.com/drive/folders/15wHXIoBvzKMc2VrkvFOjnseYGrpZ-hFm?usp=sharing.