Segun ex Prome Minister, Mike Eman: Tin influencia politico directo pa determina prioridad di OM

A pesar cu Prome Minister, Evelyn Wever-Croes a declara cu politicamente gobierno no tin ‘arte ni parte’ den e caso ‘Avestruz’, ex Prome Minister y lider di partido di oposicion AVP, Mike Eman ta kere lo contrario. Esta cu tin un influencia politico den e tarea cu Ministerio Publico (OM) mester realisa.

Pero el a laga sa cu esaki no ta di awor, sino for di Status Aparte, durante 30 aña pasa e influencia aki politico aki ta sigui sosodiendo, semper sistematicamente ora cu partido MEP ta yega na gobierno.

Durante un conferencia di prensa cu a conta cu presencia di diferente miembro di conseho di partido, e lider politico a bisa cu nan a bin pa comparti un ‘preocupacion y un pensamento’ hopi profundo pa loke ta trata e situacion sumamente preocupante di husticia na Aruba.

Influencia politico.
Nan a constata cu den diferente ocasion OM di Aruba a wordo poni bou presion politico partidista pa persigui nan oponentenan. El a referi na un estudio cu a haci, y te hasta cita algun rapport traha na Hulanda y publicacion den medio di comunicacion riba e materia aki. E ta lamenta cu OM no tin su independencia for di influencia politico, manera corte di husticia si tin’e.

Segun ex Premier Eman, ora cu nan tabata den gobierno, nan no por a bin cu e independisacion aki, pasobra un di e figuranan mas clave den e institucion aki ta Procurador General (PG). PG ta esun cu -segun Eman- ta determina e grado di influencia cu gobierno por tin.

“Si bo tin un Procurador General firme den su sapato cu weso di lomba, e Minister di Husticia por purba kico e kier, pero e Procurador General ta pone den su luga”, el a declara.

Pero pa bin cu e escogencia pa determina e personalidad di e persona cu ta asumi e funcion aki, ta algo cu no por wordo legisla of poni den ley. Sinembargo, e ta haya cu bo por traha hopi cos cu ta regarda e funcionamento di un instituto hudicial administrativo, pero finalmente ta e hendenan cu ta yena e posicion ey, ta bay determina si e instituto ey por funciona eticamente.

Eman ta haya cu na e momentonan aki tin demasiado indicacion cu presion politico ta determina prioridad basa ariba e ‘opportuniteitsbeginsel’. Sinembargo den e caso aki un fraccion politico y un gobierno ta esun cu ta determina e file cu OM mester traha riba dje. Pa partido AVP ta hopi evidente cu den e caso Avestruz, lamentablemente tin un influencia politico directo pa determina e prioridad di OM.

El a laga sa cu den un proximo gobernacion cu partido AVP ta forma parti di dje lo independisa OM di cualkier influencia politico. E lider politico ta considera cu mester crea mas distancia y garantisa independencia di OM. Pero tambe fortalece e instituto aki contra e influencia politico aki.

El a señala cu den pasado y pa varios aña su ruman y ex Prome Minister, Henny Eman tambe a bira victima di un caso, caminda influencia politico a hunga un rol. Pero igualmente el a menciona e caso di e miembro di prensa, Marko Espinoza, kende unabes cu gobierno actual a instala nan mes na Bestuurkantoor a presiona OM pa bin cu un investigacion cu a conduci na e detencion di e hoben aki. Despues di dos aña -y mesun cos cu a sosode cu ex Prome Minister Henny Eman- ta bin resulta cu nan ta wordo exhonera di tur acusacion. Sinembargo ex Premier Mike Eman ta considera cu e daño mas grandi ya caba a wordo haci, ya cu e credibilidad y bon nomber di e persona a wordo daña.

“E caso di Marko Espinoza ta uno mas recien pa prueba cu tabatin un esfuerso politico partidista pa pusha Ministerio Publico pa haci un caso”, el a bisa. E ta haya cu OM a coopera cu e insistencia politico aki. E ta haya cu a yega e momento pa AVP como partido, evalua si nan mester bay den e mesun direccion di bay bati den porta di OM pa nan haci cierto investigacion contra nan rivalnan politico.

Politica y denuncia.
Ex mandatario Eman a bisa cu como politico bo por haci denuncia. Pero esaki no ta e tarea di un politico. E problema ta sinta ora cu como politico bo ta haci e denuncianan algo sistematico pa presiona OM y tambe landsrecherche. E ta un peliger pa nos estado di derecho, el a laga sa.

Den e caso aki no ta trata di denuncia cu ta wordo haci na OM pa laga nan haci nan trabou a base di nan experticio profesional, pa mira si e caso tin merito. “Nos ta mira cu tin un insistencia sistematico”, el a bisa. Esaki pa e lider politico di AVP a keda demostra durante varios conferencia di prensa di fraccion di MEP, caminda den varios ocasion nan a referi cu nan a bay OM pa puntra riba e caso of trece mas documento cerca nan. Pa ex Premier Eman, e tipo di insistencia asina no ta corecto. E ta refleha cu bo kier influencia politicamente un aparato hudicial cu mester ta independiente y profesional.

E ta di opinion cu no ta e politico e prome yama pa bay OM pa haci un denuncia di un supuesto caso castigabel. Ta unicamente ora bo kier influencia cu politica partidista e direccion di OM pa bo atacha e credibilidad di bo oponente politico. P’esey -segun ex Premier Eman- semper nan a abstene di encamina e caminda ey.

E ta haya cu e politico tin su tarea den Parlamento cu ta un organo publico. OM por tende kico ta e debatenan politico cu tin den Parlamento. Contraloria General tin un tarea y tambe rapport ta wordo traha. Si nan ta haya merito nan por bay OM pa atende cu un ‘strafbaarheid’ of acto castigabel.