Ex parlamentario y vocero di AVP, Melvin Tromp a mustra su apoyo na e gremio comercial, mirando e reaccion y posicion di Camara di Comercio (KvK) pa e impuestonan BBO/BAZV y BAVP keda aparece keto bay riba e recibonan di compra di productonan, pa miho transparencia den e prijsnan.
“Nos ta para un shen porciento tras di pensamento di Camara di Comercio cu a vocifera nan mes, y bisa cu nan ta totalmente contra di locual ta wordo haci pa sconde e berdad den pueblo.” Te hasta Tromp a agrega cu KvK ta dicidido pa entabla un caso contra di gobierno, contra e forma cu nan kier sconde e berdad tras di e situacion aki.
Igualmente, Tromp a bisa cu Hulanda tambe a yega di vocifera nan decepcion riba e maneho di e gobierno aki riba tereno di financia di nos pais. “Mirando e situacion aki, laga nos warda kico ta e desaroyo riba locual ta regarda e pensamento cu Hulanda tin riba incumplimento di parti di e gobierno actual.” Y ainda pa locual nan ta spera den luna di juli venidero, nan ta compronde cu lo bin mas medida na caminda ,cu ta bay conduci cu nos economia ta bay cay mas ainda.
Mientras e ta ripara cu e parti di disciplina ta esencial pa regarda e maneho di financia. Sinembargo, e ta ripara cu esaki no ta e caso den e gobierno aki. El a cuestiona e sistema cu gobierno ta bin tuma hendenan na trabou na estilo ‘caco scondi’, caminda nan ta apunta cierto hende cu ta haya un cierto suma pa luna, y nan tin cu percura pa tuma cierto cantidad di hende na trabou, pa no ilustra directamente cu gobierno ta tumando un gran cantidad di hende den servicio.
E declaracion aki ta tuma luga despues cu un miembro di parlamento a tuma e iniciativa di entrega un propuesta di ley pa sigui mantene e impuestonan indirecto (BBO) riba e recibonan. Segun Tromp, e gremionan comercial aki ta expresando nan mes den un forma di disgusto riba tur medio social y medio di comunicacion. Mientras cu e ta cuestiona e actitud di minister di economia y financia, cu te hasta a pidi e gremio comercial pa yuda e gobierno aki ‘tapa e berdad riba e facturanan pa sconde e castigonan cu bo ta implementando contra e pueblo’.
Te hasta e ta haya cu e mandatario a manda un menasa den direccion di e comerciantenan. E menasa aki ta si e comerciantenan no ta tene nan mes na e cambionan aki, lo bin medida contra nan persona cu multa di cierto cantidad di placa. El a agrega cu un cantidad di comerciante awe tin e temor riba e futuro di nan negoshi, considerando entre otro cu e circulacion di placa a cay, manera Banco Central Aruba (BCA) a yega di publica.
