Ex-minister Otmar Oduber a dicidi di reacciona lihe como ciudadano pa ‘bo no laga di yerba crece’, riba e nuebe diferente denuncia relaciona entre otro di posibel fraude y corupcion.

E kehonan aki, Sr. Michael William na nomber di fundacion Nos Ta Aruba a entrega na Ministerio Publico (OM) contra Otmar Oduber y seis otro persona mas. El a bisa cu den tur acusacion aki cu a wordo entrega no tin niun documento pa prueba. “Gewoon un set di redo… yen di shicheria den dje. Pero no tin nada cu por mustra contrario na loke mi ta trece dilanti,” el a declara ayera mainta.

Oduber a cualifica e serie di acusacion contra dje como falso, redashi, falta di prueba y wega politico den cuadro di eleccion venidero. “Otmar Oduber no ta parti di eleccion”, el a bisa. E ta kere cu a pesar cu el a retira 6 luna pasa, aparentemente tin hende cu ta sinti su falta.

El a dicidi di bay recherche dialuna ultimo pa entrega un keho contra e fundacion representa pa Sr. William, debi na e nuebe kehonan cu e ta considera falso. Pero tambe pa difamacion y pa dañamento di nomber. El a pone tur cos den man di su abogado, cu ta bezig cu e keho cu el a presenta. Oduber a dicidi di no reacciona mas via conferencia di prensa pa asunto cu el a considera como politico.

Sinembargo e ta haya cu tur hende tin su derecho pa emiti su expresion liber, y tambe entrega keho. Pero na final di dia, un hues ta esun cu ta dicidi. Actualmente tin dos keho entrega, un di cada banda, y e ta haya cu mester warda te final pa wak kende tin pruebanan of no.

Kehonan y reaccion

El a bay riba cada un di e acusacionnan formula contra su persona. El a reitera cu nan tur ta falso y sin base of falta di prueba.

Un di nan ta concerni na incinerator. Segun e acusacion, e ex minister y su sponsornan lo kier gana 20 miyon florin na comision. Oduber a declara ayera cu no tin niun prueba, ya cu no tin niun incinerator cu a wordo cumpra. “No por tin niun comision cu a wordo paga di 20 miyon, simplemente un mentira grandi.”

Otro acusacion cu el a referi ta den conexion cu e caso Ibis. E tin di haci cu tempo aya, e tabata minister di Labor y cu supuestamente el a forma parti di e mesun apto di corupcion pa cual su sucesor P. Croes a keda condena. Sr. Oduber a bisa cu e un acusacion falso y cu nan mester para responsabel p’e. Ya cu e tempo ey tabatin un proceso cu a wordo poni, netamente pa evita cu permisonan tabata wordo uza y bendi. Te hasta nan a yega di para loke tabata tramitado pa evita cu lo por tin oferta haci di compra of benta di cualkier permiso, etc… Igualmente el a bisa cu henter e proceso a wordo investiga y no tabatin nada robes.

Otro punto di keho riba e documento entrega pa fundacion Nos ta Aruba tin di haci cu iregularidad na aeropuerto chikito. Esta cu Otmar Oduber a kita e aeropuerto priva for di Universal, cu tabata su operador, pa traspasa un amigo di dje. Oduber a bisa cu e acusacion aki ta falso. E tempo aya na aña 2017, aeropuerto mes como un N.V. cu no tin nada di haci cu gobierno, ta haci su transaccion completamente priva na 2017. El a bisa: “2017 Otmar no tabata minister.”

Un keho mas tabata riba envolvimento di ex mandatario Oduber den e compania Aruba Airlines, cu el a considera falso. Tambe cualkier envolvimento di su persona den negoshinan ilegal cu gobierno Venezolano. “Otmar Oduber no tin nada di haci pa loke ta trata di ta propietario di Aruba Airlines,” el a bisa.

El a bisa cu e ta otro mentira fragante, ya cu su persona no tin nada di haci cu structura di e compania aki. “Mi no ta doño di Aruba Airlines. Mi no ta socio di Aruba Airlines tampoco.” E ta kere cu den e caso aki, e propietario ta esun cu mester papia pa nan mes, kende tin green card y ta biba na Merca. Tambe e punto di envolvimento of no di gobierno di Venezuela den e compania aki, e ta haya cu e asunto aki te hasta a wordo cuestiona den Tweede Kamer na Hulanda. Ademas e compania aereo aki a pasa screening, no solamente pa medio di departamento di Aviacion Civil, sino pa otro departamento, manera Veiligheidsdienst (VDA) y Banco Central. E no ta considera su mes como un persona poderoso cu por tin influencia riba tur e instancianan aki.

Otro keho di e pakete di nuebe tin di haci cu Otmar Oduber como minister a otorga dos tereno grandi pa proyectonan hotelero na Savaneta pa droga y ilegal por drenta Aruba, el a bisa. Segun e ex mandatario, el a yega di duna dos tereno na Savaneta di alrededor di mil meter cuadra. Pues nan no ta tereno demasiado grandi. Un di nan a wordo otorga pa un famia Henriquez cu tin pa basta tempo un boutique hotel chikito. Otro pa famia Refunjol-Maduro. Nan ta yiunan di tera cu a cumpli cu tur rekisito exigi pa haya un tereno, el a bisa.

Encuanto otro acusacion cu no tabatin un destaho publico pa tereno otorga pa un hotel di 900 camber na Sero Colorado. Oduber a bisa cu e no ta conoce un tereno comercial na Aruba cu a wordo pasa of duna via un destaho publico. Nos terenonan ta wordo otorga a base di leynan y cumplimento di cierto rekisitonan. Te hasta a wordo haci un escrutinio mas profundo –el a bisa– riba e grupo cu lo ehecuta e proyecto aki, compara cu tur otro compania cu a inverti na Aruba.

E di shete acusacion ta cu ex-mandatario a entrega un cantidad di tereno na sponsornan pa e desaroyo di e proyecto di Port City. Otmar Oduber a bisa cu no solamente niun tereno a wordo entrega den waf. Pero e no haya niun peticion mes haci pa tereno eynan. El a referi cu tabatin tereno di pais Aruba ariba e tereno di waf, y esaki a wordo traspasa pa Aruba Port Authority (APA) N.V.

Rond di e caso di Fondo Desaroyo San Nicolas, y su reapertura, el a bisa cu nunca e caso aki a wordo para. Pues e ta bisa cu ta mentira cu ex-minister Dowers e tempo aya a para su caso. Al contrario, 13 hues y shete caso cu a tuma luga e tempo ey, tur a libr’e di cualkier acusacion. Ademas, el a agrega cu den casacion, OM mester a paga su persona un suma considerabel pa daño y perhuicio.

Finalmente el a referi na e di nuebe keho haci contra dje di e cobransa di 7,5 promille riba traspaso di tereno pa proyecto cu ta wordo exigi pa inversion. E unico diferencia –segun Oduber – cu a wordo introduci ta e hecho cu tin un comision cu a bin pa control y cu nan a anuncia via parlamento.

El a bisa cu awe esun interesa di haya sa mas pa kendenan e placa aki a bay y con e placa a bay, tin un lista completo, caminda nan por verifica cu e companianan cu a haya tereno riba e cuater tema: cultura, innovacion, naturalesa/medio ambiente y deporte. Segun Oduber ta e mesun desaroyado ta esun cu ta duna e placa aki a base di un exigencia di basta tempo atras, y cu ta pasa via notario.