Ex minister di Husticia y parlamentario di oposicion, Arthur Dowers a papia riba ultimo desaroyo tocante siguridad di nos pais. El a trece dilanti su preocupacion riba e cantidad di atraco y te hasta kimamento di scol cu a tuma luga recientemente. Ayera mes, un otro atraco cu arma di candela a tuma luga na Kang MingHua supermarket, situa na Dakota.

Bon Dia Aruba a confronta e parlamentario Dowers cu e hecho cu durante tratamento di presupuesto complementario, minister di Husticia a bin cu cifranan pa ilustra cu e indice di criminalidad a baha, compara tempo cu Dowers tabata minister di Husticia den gobierno anterior.

“Locual mi por bisa bo ta cu Andin Bikker ta manipula cu cifra”, el a declara.

Cifranan.
Dowers a señala cu e cifranan cu tin, of a lo menos esunnan mas actualisa, ta cifranan cu ‘nos a cuminsa acumula.’ Segun Dowers, e mandatario di Husticia a bin parlamento pa bin gaña nan, cu tabatin 100 atraco den un aña. “Absolutamente no ta berdad!”, segun e miembro di oposicion. Te hasta el a critica cu e mandatario a bin cu un cifra cu casi 100% di e crimennan ta wordo cometi pa Venezolanonan. Mientras cu e mesun cuerpo di polis a bin cu cifra oficial cu un 80% di e crimennan a wordo cometi pa hendenan local.

Igualmente Dowers a bisa cu tempo cu e tabata minister di Husticia, nan tabata registra tur incidente of atake contra un hende, sea cu nan a uza cuchiu, machete, etc… of cu nan tabata ranca un pertenencia for di nan, bou e categoria di atraco. Tur esaki tabata aumenta e cifranan. Pero e ta mira cu aworaki e mandatario en cuestion ta manipula cu e cifranan.

“Gaña e ta gaña bo y loke nos ta bibando aworaki, esey ta e realidad,” segun Dowers. E ta haya cu e realidad ta cu e situacion di criminalidad cu ta sutando nos comunidad nos no a conoce nunca.

Recuerdo.
Dowers a trece algun recuerdo tempo cu e tabata minister di Husticia, y e mandatario tabata parlamentario di oposicion.

E tempo aya, minister actual di husticia a sigura cu e lo bin cu man duro pa combati criminalidad, si e ta drenta gobierno. Ademas como parlamentario, Bikker tabatin solucion y plan pa tur cos. Te hasta ora un crimen a sosode contra un turista, el a bin cu un plan di 6 Euro for di Hulanda pa combati y reduci crimen te hasta un 50%. Pero awor e por mira cu recientemente a sosode dos atraco contra turista riba e mesun dia. Nan a drenta un hotel grandi y nan a atraca e hotel mes, turista y comerciante y te hasta nan a tira contra e security den area di hotel. “Pero Sr. Bikker awor ta keto keto…” Dowers a bisa.

Dowers ta corda cu a yega un momento cu el a ‘hiba un lucha tenaz contra criminalidad,’ el a bisa. Entre otro un serie di atraco caminda nan mester a fortifica Atraco Team pa nan por lucha contra e delincuentenan. Sinembargo tiramento den hotel, nan no a yega di conoce, segun ex minister Dowers.

Dowers no por tilda responsabel Bikker riba tiramento den hotel, pero si tempo cu Bikker tabata parlamentario a yega di bisa cu minister di Husticia mester tuma su retiro, pasobra como minister di Husticia e ta responsabel, si nan ta atraca un turista of si nan ta tira den un hotel. Awor e ta haya cu Bikker mester bin cu su propio conclusion.

Tambe Dowers a bisa cu e tempo aya, nan a cuminsa cu un campaña preventivo, unda nan a bishita diferente sitio cu tabata vulnerabel pa loke ta crimen. Te hasta nan logra e tempo aya -segun Dowers- di aumenta siguridad den cierto area pa evita cu e hendenan por bira victima di atraco. Sinembargo e ta ripara cu e tempo aya, como parlamentario di oposicion, Bikker nunca tabatin un palabra di elogio pa nos cuerpo di polis, y no solamente esey, sino cu el a purba di caba cu su persona como minister di Husticia.