Ex Minister di Energia y actual Parlamentario di oposicion, Mike de Meza, ta lamenta cu e compania Spaño Repsol ta bandona nan exploracion di gas y recurso di energia den nos lama teritorial; pero pio ainda, cu gobierno no a bin Parlamento ainda pa duna un splicacion detaya rond di e decision aki.
“Nos no sa e detayenan. Pero esun responsabel di henter e proyecto aki ta Prome Minister di Aruba, cu ta Minister di Energia” el a declara.
E parlamentario a bisa cu gobierno su participacion den esaki ta sumamente importante. Mientras cu e risico di pais Aruba den e proyecto aki tabata cero. Pero si e ganashi tabata grandi den caso cu Repsol por a haya algo den nos plataforma maritimo.
Tampoco un argumento no por ta cu gobierno no por a haci nada debi cu nan espacio financiero ta limita. Pasobra e proyecto aki no tabata costa pais Aruba nada. E no ta descarta cu e Compania Arubiano di Petroleo (CAP) por a conseha gobierno pa sigui cu e proyecto aki. Pero den e caso aki mester tin un minister cu ta interesa pa sigui cune.
Falta di informacion.
Segun de Meza, niun dia e mandatario aki a bin Parlamento pa atende cu e decision aki. Unico argumento cu nan a trece dilanti ta cu Repson no a haya nada. Mientras cu e parlamentario a declara na Bon Dia Aruba cu ‘tin hopi interes ainda’ den e proyecto aki. El a agrega cu te dia di awe ainda Repsol tin interes.
Pero e ta puntra su mes: “No a haya nada di kico?” Nan no tin informacion di e ultimo desaroyo di Repsol su exploracion te ora cu e gobierno actual a sinta.
De Meza kende a yega di negosha cu Repsol pa bin Aruba, a bisa cu nan no sa te ki fase nan a yega. Ademas nan lo desea di sa kico Repsol a haci ultimo tempo, cuanto perforacion of exploracion tabatin y ki sorto di analisis a tuma luga. Pero tambe dicon e partner cu nan tabatin a bay. E tabatin cantidad di pregunta rond di e topico aki cu e ta considera puntonan cu gobierno mester a splica na Parlamento.
“Corda bon tur cos ta pasa den e zona economico y awa teritorial di pais Aruba ta di pais Aruba,’ el a declara.
Aunke e no por tira tur cos riba lomba di gobierno, pero si gobierno ta un parti sumamente importante pa Repsol por a sigui cu e proyecto di exploracion aki. Sinembargo si no tin un gobierno cu ta sostene e proyecto, y sinta cu Repsol pa check kico ta e problema y retonan cu nan tin, dificilmente nan por a continua. Pero loke e ta haya lamentabel ta cu Repsol a bula afo pa bay otro caminda cu tin menos data y potencial pa un hallazgo grandi. Mientras cu rond di Aruba hallazgo grandi a keda descubri keto bay. El a menciona cu te hasta Corsou ta bezig pa contempla un proyecto di exploracion. Te hasta nan ta papiando cu e mesun Repsol pa bay haci estudio cerca nan.
Parlamentario De Meza ta haya cu gobierno por a participa, no financieramente, pero cu informacion y contactonan cu nos tabatin cu Hulanda, Inglatera y Merca pa evita cu Repsol por a bandona nan proyecto di exploracion.
El a critica gobierno di Gabinete Wever-Croes cu a laga bay proyectonan y institutonan cu por a forma parti di otro pilar economico pa nos pais. Nan a laga bay un instituto prestigioso manera TNO cu tabata pas cu e concepto di un economia di conocemento.
Te hasta el a tribi di menciona refineria como otro opcion pa genera desaroyo economico. Mientras cu e ta mira cu e gobierno aki no ta trahando riba niun proyecto, ya cu tur proyecto cu tabata andando for di e gobierno anterior, nan a cancela. E no ta kere cu tur proyecto mester tabata malo pa gobierno actual por a tuma e decision di para nan definitivamente.
