E necesidad di vivienda na Corsou a aumenta. Asina Oficina Central di Estadistica (CBS) ta bisa. Na 2008 tabatin necesidad di algo mas cu 10 mil vivienda. E ultimo sondeo ta papia di algo mas cu 16 mil vivienda.
Na fin di 2016, CBS a tene un encuesta pa midi necesidad di vivienda. Ta haci esaki cu e meta di haya un bista general di e aspectonan cuantitativo y cualitativo di e demanda existente pa vivienda na Corsou. Loke kier a sa ta cuanto persona of grupo di persona cu ta biba den cas di famia tin necesidad di un otro luga di biba y cua ta nan deseonan relaciona cu e luga di biba cu nan ke.
A tene e encuesta den e lunanan di september october di 2016, uzando un muestra di 1.923 cas di famia di e poblacion total. Ta considera cu composicion y tamao di e muestra ta estadisticamente adecua pa por haci afirmacion tocante e poblacion total. A tene e encuesta cerca hende di 18 aa pariba.
Algun resultado importante di Encuesta riba Necesidad di Vivienda di september -october 2016:
Ta calcula cu, den poblacion total di Corsou (= 58.010 cas di famia), actualmente tin necesidad di 16.160 vivienda. Esey ta igual na 30% di tur cas di famia na Corsou.
Na 2008 tambe a tene un encuesta di necesidad di vivienda. E tempo ey, a calcula cu tabatin necesidad di 10.571 vivienda, igual na 23% di e cantidad di cas di famia cu tabatin e tempo ey.
E cifranan aki riba ta mustra cu den e periodo di 2008-2016, e necesidad di vivienda a subi cu 7 punto porcentual.
Dos echo cu ta indica e aumento di necesidad di vivienda a bin padilanti den e encuesta, esta cu:
– den e periodo di 2008-2016 tabatin un aumento relativo den e cantidad di cas di famia tambe (na 2008 tabatin 45.352 cas di famia na Corsou, pa un poblacion di 145.220 persona (un proporcion di 0.31), mientras cu na 2016 tabatin 58.010 cas di famia, pa un poblacion di 156.769 persona (un proporcion di 0.34);
– di 2008 pa 2016, e porcentahe di persona cu necesidad di vivienda y cu ta bisa cu nan ke biba riba nan mes a subi di 22% te na 37%.
No obstante e diferencia cla cu tin den e necesidad cuantitativo di vivienda entre 2008 y 2016, den algun sentido e prome resultadonan di e encuesta di 2016 ta parecido na esunnan di 2008, specificamente pa loke ta trata e tipo di vivienda cu hende ta desea. Ainda e tipo di vivienda mas desea na Corsou ta un cas para riba su so, di 50 pa 100 m2, riba un tereno entre 400 y 600 m2, cu tres camber di drumi i un tualet. Mas aleu, poblacion ta prefera di tin un cas propio y ta prefera tambe di traha e cas nan mes.
Tin un estudio mas profundo y amplio andando di e datonan cu a obtene durante e encuesta y esey lo indica si acaso y te con leu, tin cierto dato cu a bini padilanti den e bista general aki di necesidad di vivienda na Corsou cu ta remarcabel of cu ta indica un desaroyo nobo.
