Diabierna den oranan di marduga, habitantenan di San Fuego a reporta un incidente unda un palo di luz a kima lagando un parti di bisindario sin coriente.
Pa 11or di anochi aproximadamente, e habitantenan a reporta via Facebook cu e palo di luz a kima y a keda cendi na candela pa varios minuut, despues el a cay, lagando e habitantenan di e area sin coriente pa aproximadamente 6 ora.
N.V ELMAR mediante su rednan social a informa cu area di Santa Cruz ,San fuego ,Urataka Cas Ariba tabatin un storing. “Debi na e calor y secura un di nos palonan di luz di halto voltahe a pega candela, y esaki a causa un interupcion. Nos tecniconan ta na e sitio pa atende cu e situacion. Nos lo trata na reestablece coriente dentro di poco,” nan a sigura
E compania a splica cu pa 11:00 di anochi a registra un storing den area di San Fuego, Seroe Compa, Cas Ariba, Shete, Sombre. Un di nan palonan di luz di halto voltahe a pega candela.
Pa 12:30am: Suministro di coriente a keda reestableci bek den e siguiente barionan: Urataka, Cas Ariba, Seroe Compa, Sombre,Shete y San Fuego un parti.
Pa 12:45am: Un parti di San Fuego, esta San Fuego 19-A y vecindario, nan lo a mester cambia e palo di luz y nan tabata premira cu den un periodo di 4 ora, e bario lo a ricibi coriente back.
Pa 2:52am: Palo di luz nobo a keda instala, nan tecniconan tabata purbando di logra pone coriente, mas lihe cu nan por.
Pa 5:18am: Nan tabata calcula cu posiblemente den 10 minuut lo tabatin coriente back den bario.
Finalmente pa 5:38am: Nan tecniconan a keda cla y coriente a keda restaura.
Riba e post di ELMAR e comentarionan no a tarda pa reacciona caminda algun di nan a senala cu por ehemplo: “Otro paisnan cu ta hopi mas calor e cos aki no ta pasa, busca otro cos pa gaña, FALTA DI MANTENCION, pero pueblo si ta paga pa cada seconde y ora cos ta kima den cas pa coriente halto demas of mucho abou ELMAR no ta paga manera mester ta.”
Entre otro, “mester tin berguensa di bisa cu pa boso falta di control e situacion di e palo di coriente tabata asina deteriora.”
Sigur un trabou grandi cu mester a tuma luga den oranan di marduga y cu ELMAR mester keda pendiente cu e palonan di luz rond di e isla ya cu tin di nan cu ta hopi deteriora caba y por representa un peliger.
