(AP) – Un cantidad di companianan grandi di tecnologia ta lidera e careda pa comercialisa inteligencia artificial y no por ser confia pa garantisa e siguridad di sistemanan cu te ainda nos no ta compronde y cu ta core riesgo di “comportamento caotico of cu no por premira,” un ehecutivo di compania di inteligencia artificial a declara na e prome reuion di conseho di Siguridad di nacionnan Uni tocante menasanan di Inteligencia Artificial.
Jack clark, co-fundador di e compania di inteligencia artificial Anthropic, a bisa esaki ta e motibo dicon e mundo mester bini hunto pa preveni mal uso di tecnologia. Clark, ken ta bisa cu su compania ta traha duro pa train su chatbot di inteligencia artificial pa enfatisa cautela y siguridad, a bisa cu e cosnan mas util cu por haci awo ta “traha riba desaroya maneranan pa test capacidadnan, mal uso y fayonan potencial di siguridad den e sistemanan aki.” Clark a sali for di OpenAi, creador di ChatGPT, pa funda anthropic, ken su producto ta yama Claude.
El a monitor e crecemento di inteligencia artificial durante e ultimo decada unda sistemanan nobo por traha miho cu pilotonan militar den simulacionnan di pelea aereo, stabilisa plasma den reactornan nuclear, diseña componentenan pa e proximo generacion di semiconductor y evalua productonan den fabricanan. Sinembargo mientras inteligencia artificial ta trece beneficionan grandi, su comprendemento ora ta trata biologia por ehempel, por causa cu e sistema por produci armanan biologico tambe.
Clark a adverti tambe di e “menasanan potencial na pas internacional, siguridad y stabilidad global” for di dos cualidad esencial di inteligencia artificial cual ta nan potencial pa mal uso y e hecho cu no por premira con e sistema lo actua. Tambe el a enfatisa cu den henter mundo ta e companianan di tecnologia tin e computernan sofistica, cantidadnan grandi di data y e capital pa crea sistema di inteligencia artificial y pa e motibo aki ta mas probabel cu nan lo sigui defini su desaroyo.
