Pa economista Randall Croes, cualkier medida adicional cu Merca su presidente nobo, Joe Biden, lo por bin cune pa contene e contagio di Covid, lo por tin su efecto economico pa Aruba. “Pa loke ta nos economia, e lo dal nos bastante duro si bin un lockdown,” el a bisa.
Sinembargo e no ta kere cu Merca lo bin cu un medida di lockdown al estilo Europeo. Un punto cu el a trece dilanti ta cu nos no mester lubida cu Merca ta depende di turismo tambe. “No ta solamente nos! New York y Florida, nan tambe ta depende di turismo cu ta bay cerca nan,” el a bisa.
P’esey economista Randall Croes no ta kere cu gobierno di Biden lo bin cu un medida pisa di lockdown asina facil. Pasobra e por bira un problema hopi grandi pa Merca mes. Tambe Merca nan sistema nacional di terminal aereo of aeropuerto ta un fuente di trabao hopi grandi. Y nan economia ta depende di e trafico di hende.
Mas bien e ta kere cu e gobierno nobo di presidente Biden lo sigui purba domesticamente di bin cu cierto medida, manera esun vigente si bo ta drenta Merca bo mester tin un PCR test y sin cuarentena. Tambe e uzo di tapaboca obligatorio. Igualmente lockdown local caminda tin brote grandi.
Di e forma aki nos por scapa nos economia di un golpi duro. Ya cu nos por realisa e tipo di test na Aruba pa e turista Mericano por drenta cune den nan pais. Y nos como pais mester percura pa realisa e tipo di prueba aki di un forma confiabel y dirigente; y ya nos gobierno ta trahando riba dje caba.
E ta kere cu e control lo bira mas pisa pa bay bek Merca, caminda autoridad Mericano lo ta mas vigilante. Pero si nan mester haci otro test, unabes cu e biahero ta yega Merca, e ta haya cu esaki ta un politica domestico. E no ta descarta cu esaki lo bira un rekisito formal. Pero tur esaki mester wordo haci di un forma stricto, ya cu Merca ta depende di turismo tambe.
E ta haya cu e medida sanitario di Biden di no uza of kitamento di tapa boca como un sticker politico, manera ex presidente Donald Trump a yega di hacie, lo bira cos di pasado. Segun Croes aki un par di aña si nos considera cu un presidente di un partido a realisa cu e kitamento di un tapa boca a refleha su opinion politico, e tabata algo iresponsabel.
E moda cu a wordo imponi ta cu si bo ta cana rond sin tapa boca y expone otro hende cu e virus, bo ta Republicano orguyoso. Y si bo ta uza tapa boca pa protege bo conciudadano, bo ta Democrata. E ta mira esaki como ‘berdaderamente algo iresponsabel.’ E ta spera cu pronto e situacion aki no t’ey mas y pronto efectonan positivo lo por tuma luga.
