Segun Eagle LNG, ta finalisando detayenan di construccion y ruta di tuberia di gas natural

Den un edicion anterior di Bon Dia Aruba na principio di e aña aki, a publica un articulo cu preguntanan tocante e estado actual di proyecto di gas natural na Aruba. Bon Dia Aruba a tuma contacto cu Eagle LNG Aruba pa contesta algun pregunta tocante e situacion actual, pero no a logra ricibi contesta e tempo ey, pero awo a logra ricibi contesta ariba e preguntanan aki di parti di Eagle LNG Aruba.

Na januari 2021 tanto WEB Aruba NV como refineria di Aruba a firma convenio cu Eagle LNG LLC pa establece suministro di gas natural likido na WEB pa usa na luga di Heavy Fuel Oil (HFO), y den caso di RdA NV pa establece e punto di entrada di gas natural riba nan tereno y pa explora e posibilidadnan di entrega di gas na cliente den exterior. Asina Aruba lo sirbi como punto di inicio y referencia di Eagle LNG den nos region.

Eagle LNG Aruba a splica den su contesta ariba e pregunta tocante e estado actual di preparacion di e instalacion, incluyendo e trayecto cu e tuberia di gas di San Nicolas pa Barcadera mester haya, cu nan ta finalisando e detayenan di construccion y ruta di e tuberia di gas natural cu e autoridadnan di Aruba cu ta encarga cu e revision di e construccion di e proyecto. Representante di e compania a agrega cu te cu e fecha di awe no tin cambionan importante cu a wordo haci na e ruta cu a wordo presenta na e publico durante e sesionnan habri na Colegio EPI.

Bon Dia Aruba a puntra ariba e perspectiva tocante comercialisacion di gas natural den e region, den bista di e hecho cu mayoria di e mercado di cierto grandura ya tin suministro di gas natural di otro compania. Eagle LNG a remarca cu e apetito pa gas natural den e region ta sigui crece, particularmente pa proyectonan unda cu e gas natural ta bin for di Merca.

El a sigui splica cu e tendencia aki ta wordo impulsa pa e necesidad di usa fuentenan mas limpi y barata cu ta genera energia compara cu HFO. “Den e sector marino nos ta wak tambe un tendencia di parti di e barconan di carga y di liñanan di crucero pa tin disponibilidad di suministro di LNG den Caribe,” e compania a indica na Bon Dia Aruba.

Pa loke ta trata e mayoria di paisnan grandi den region cu disponibilidad di LNG caba, a puntra si tin solamente perspectiva limita pa bende LNG cu otronan. Na esaki Eagle LNG a contesta cu si ta trata tocante e benta di LNG for di e terminal di LNG na Aruba, tin un potencial limita pa provee pa otro paisnan den Caribe ya cu e proyecto ta crea pa suministra gas natural pa WEB su necesidadnan di generacion di energia.

El a subraya cu den futuro, cualkier interes di otro paisnan den region pa ricibi LNG for di e terminal di Aruba lo mester wordo evalua caso pa caso.

Bon Dia Aruba a puntra tambe ariba e status actual di refineria, como potencial cliente di LNG y si ta kere ainda den reactivacion di e refineria cu uso di gas. E compania a indica cu si refineria tin posibilidad di habri atrobe, e terminal di LNG lo por suministra gas natural pa su funcionamento.

Tempo cu Eagle LNG a anuncia cu e trayecto di e tuberia di gas natural lo pasa den e tereno di Marinierskazerne, Kazerne a declara na september di aña pasa cu mientras no tin detayenan concreto ariba e plan di Eagle LNG pa cu e trayecto di e tuberia, specificamente den tereno di Kazerne, no por duna aprobacion pa e tubonan pasa riba nan tereno.

A puntra Eagle LNG Aruba ariba e status actual di e trayecto di tuberia di gas na Savaneta unda mester pasa riba tereno di Marinierskazerne y si ta bay mantene e trayecto original di tuberia.

Eagle LNG a splica cu ariba solicitud di Marinieskazerne, nan a elabora diferente estudio cu ta considera actividadnan actual y den futuro na Marinierskazerne cu e meta di evalua cu no ta existi riesgonan na a largo plaso cu e ruta di tuberia den e tereno di Marinierskazerne.

Mirando e situacion actual di mercado internacional di gas natural, cu nivel di prijs halto a causa di e guera na Ucrania, a puntra Eagle LNG si esaki ta haci dificil pa desaroya e proyecto na Aruba na nivel di prijs competitivo.

El a splica cu e LNG cu lo wordo suministra na Aruba lo bini for di Merca. Nan suministro ta consisti di haci e LNG na nan planta di liquefaccion na Jacksonville, Florida usando gas natural domestico. Debi na e reservanan abundante, Merca tin un di e prijsnan mas barata pa gas natural na mundo y haciendo su mesun LNG en bes di cumpra esaki ariba mercado, Eagle LNG lo por ofrece un prijs di LNG hopi competitivo na Aruba.