Ta bay crea responsabilisacion den reportahe financiero, ademas cu ta bay revisa procesonan pa duna un miho bista riba e situacion financiero real di Aruba. Esaki ta un di e elementonan crucial den e reportahe di ehecucion pa e ultimo kwartaal di 2020, cu Ministerio di Finanzas a manda pa Parlamento di Aruba y College Aruba Financieel Toezicht, CAft.

Aruba a cera 11 prestamo na 2020 pa un total di 1.1 biyon florin. A financia 21 porciento di e suma aki localmente, na un balor di 233.1 miyon florin. E resto tabata financia cu prestamo internacional, di cua 455,4 tabata presta riba mercado di capital y 414,4 a bin di prestamonan preferencial di Hulanda.

For di e total di 1.1 biyon florin na prestamo a logra paga 296 miyon florin na debenan cu a madura. E debe total na prestamo a subi cu 807 miyon florin, y riba esey, a saca 50 miyon na bononan. Pues en total, e nivel di debe debi na prestamo a subi cu 857 miyon florin.

No ta haci distincion entre prestamo formal riba mercado di capital y financiamento riba mercado di placa, cu ta debe di duracion cortico, capital di traha of debenan latente. Tur e debenan, sea ta di mercado di capital of di placa, ta asigna y como tal no ta importa e domicilio di esun cu a presta. Ta inclui e bononan por ehempel den e instrumento local di capital, pero nan ta realmente instrumentonan cu mester yuda den e capital di placa di Gobierno.

Maneho financiero

Den palabracion cu CAft, a dicidi pa enfoca riba e dos actividad principal cu ta dirigi na yega na e obhetivo di mehoracion den maneho financiero di Aruba. Esakinan ta prome e asina yama ‘nulmeting,’ esta establece e punto base riba e con tur tema relaciona cu e forma di controla cuentanan anual ta hinca den otro. Esaki ta encera crea un responsabilisacion special pa 2020.

E forma con e ta hinca den otro ta pa ilustra e necesidad di diferente actor envolvi den maneho financiero, pero teniendo cuenta tambe cu e capacidad hopi limita en general, pero particularmente den e funcion di auditoria di Aruba. Den e ‘nulmeting’ ta busca forma unda por crea procesonan di forma cu por anda mas miho y facil cu e funcion di auditoria y e practica diario. No por spera di e aparato cu e por ehecuta procesonan compleho, mientras cu tin un accesibilidad limita na personal cualifica. Segun Minister di Finanzas den reportahe di ehecucion, esaki ta un reto, banda di e auditoria di procesonan compleho asina. Y cu resultado di e analisis basico lo por percura cu por logra mehoracion basa riba e principionan, cu ta e simplificacion; eliminacion di partinan y procesonan innecesario; standarisacion entre y denter e procesonan; y automatisacion unda ta posibel y oportuno.

Investigacion SOAB

A conclui un nulmeting den e ultimo kwartaal. Pero pa motibo di e capacidad organisatorio limita, mester a scoge entre temanan cu mester a haya atencion mesora, y cua lo bin na turno despues. E acercamento di e tema ta basa riba e contesta riba e pregunta, cua tema ta rekeri e responsabilisacion special pa 2020 y cu ta di importancia pa e investigacion di balans independiente corespondiente pa 2021. Manera a indica den pasado, e investigacion aki lo ta ehecuta pa e Stichting Overheidsaccountantsbureau (SOAB). Pa motibo di e investigacion aki a dicidi pa tuma como prioridad mehoracion di e maneho di cuentanan transitorio na Direccion di Finanzas. Esaki ta encera un cantidad di saneamento di cuentanan cu no ta relevante mas y ta stroba un bista cla riba e resultado di balans. Na momento cu presenta e Cuenta Anual di 2019, lo duna relato riba e punto aki, y lo ilustra e mehoracion den e balor di informacion. Pa e motibo aki tambe, banda di e problemanan cu COVID-19 a trece, cu a pone cu no a produci e cuenta anual di 2019 ainda, e Minister a bisa den e reportahe di ehecucion.

Sector Colectivo

Pais Aruba, Organo Ehecutivo di AZV, SVB, ATA, Universidad di Aruba, Serlimar y Stichting Educacion Profesional Basico (SEPB) ta forma parti di e sector colectivo di Pais Aruba, segun acuerdo cu Hulanda pa e añanan presupuestario 2019-2021. Pa Serlimar, ta kere cu pa fin di 31 di December lo tin un resultado positivo, debi na e reduccion di gasto di personal y costonan general, entre otro huur. Pa loke ta AZV y SVB a tene cuenta cu contribucion di Pais cu ta determina y sosten di emergencia. Na e momentonan aki, Gobierno ta dedica atencion pa haci e transferencia di informacion mas eficiente pa loke e reportahenan di kwartaal. E prome paso den e proceso ta relata na e entidadnan AZV y SVB.

AZV

E resultado monetario di AZV ta basa riba e punto di salida cu e contribucion di Pais Aruba ta locual a keda presupuesta, cu ta 12,2 miyon florin, di cua 9,5 miyon florin a bay pa expansion di IMSAN y 2,7 miyon florin pa suplementa e presupuesto di AZV, ademas di e 95,9 miyon florin cu a bin pa AZV via SIAD y otro gastonan di COVID-19 conforme e calculacionnan di pronostico di AZV. Esakinan ta e primanan, y BAZV, ambos segun e realisacion di fondo efectivo te cu fin di 2020, y cu e costo di maneho a tene cuenta cu e medidanan pa reduci gasto pa costo regular.

E reduccion di salario y prima di e trahadonan a bay pa e fondo di FASE.

Bou costonan di cuido tin un suma di 25 miyon florin cu a pone un banda pa gasto adicional di cuido relaciona cu COVID-19. A cambio, e cantidad di peticion pa tratamento medico den exterior a mustra un caida drastico.

SVB

E resultado temporario di SVB ta mustra un buraco di 14,9 miyon florin den e fondo di AOV pa 2020. E entrada di prima ta den e rapport di SIAD ta inclui e primanan di añanan anterior. E entrada di prima sinembargo, a resulta mas hopi cu SVB mes a spera. SVB a ricibi 10 miyon di Gobierno como contribucion na e fondonan. Di esaki, 5 miyon florin ta bay pa e fondo di AOV y 5 miyon pa e seguro di malesa. E costonan di pago a aumenta conforme expectativa, basa ria e cantidad di persona cu a yega na edad di pensioen cu te e aña aki ta 63.

Mientrastanto, e resultado di explotacion pa e fondo di AWW ta mustra un surplus di 1,7 miyon pa 2020. E entradanan di prima ta den e rapport di SIAD. E motibo di esaki ta cu hopi viuda a yega edad di 63 y a pasa pa e pensioen di behes, mientras cu e yiunan a yega e edad di 25 y no a entrega un declaracion di scol.

E seguro di malesa di otro banda tin un buraco di 1 miyon florin pa 2020. Esaki ta pa motibo di e cantidad di aseguradonan cu a cay, y e pago di prima a conoce un reduccion di 4,3 miyon florin, cu ta 12,7 porciento menos compara cu 2019. Di otro banda, e costonan tambe a mustra un caida, esta 2,7 porciento. E cantidad di trahado sigura na SVB a cay cu 5.2 porciento na 2020.

Mientrastanto ta trahando riba coreccionnan y otro calculacion basa, y tin un probabilidad cu e buraco den e fondo di malesa por bira mas grandi.

Di otro banda, e fondo di accidente si tin un surplus grandi, di 4,3 miyon florin pa 2020, esaki a pesar di un reduccion di entrada di prima pa un total di 1,2 miyon florin, cu ta un caida di 11,3 porciento compara cu 2019. E pagonan a subi un poco. E reduccion den prima ta debi na e caida den trahadonan inscribi na SVB. E resultadonan aki ta temporario y por bin cambio ainda.

E fondo di Cesantia ta mustra un buraco di 100 mil florin pa 2020. E contribucion di cesantia di dunadonan di trabou ta 1,8 miyon florin cu ta un reduccion di 100 mil florin compara cu 2019. E entrada total pa e fondo aki ta 2,65 miyon pa 2020. E pagonan di cesantia di otro banda, incluso primanan social, a sali na 1 miyon florin pa 2020.

SVB ta kere cu e pago di cesantia lo aumenta drasticamente na 2021, y conforme e ley saneamento di e seguro di malesa, ainda mester traspasa 1 miyon florin di e fondo di cesantia pa e fondo di malesa pa tapa e buraco eynan. Consecuentemente tin un buraco di 100 mil florin.