Recientemente e Executive Director di IMF (Fondo Monetario Internacional) Sr. Paul Hilbers tabata di bishita na Aruba. E ehecutivo tabata na Aruba pa reuni cu minister di Finanzas y Cultura, Xiomara Maduro, cu Conseho di Minister, cu ehecutivonan di Banco Central y alabes a duna un presentacion tambe ariba loke ta economia di Aruba.
Durante e presentacion Hilbers a indica cu e evaluacionnan cu IMF ta haci pa Aruba ta di hopi importante y e resultadonan ta hopi positivo. El a subraya tambe e areanan unda Aruba por pone mas atencion y mehora.
Un di e areanan aki ta e diversificacion di e economia di Aruba y e otro ta e riesgonan di e cambio climatico. E ehecutivo di IMF a remarca cu e tema financiero di un pais no ta solamente e placa pero e por ta hopi mas cu esey.
Mediante un video publica ariba e pagina di Facebook di Gabinete Wever Croes, Hilbers a elabora ariba su bishita y e punto y temanan cu a bin dilanti. “Mi mester bisa, mi ta hopi impresiona cu un pais bunita. Bunita den termino di edificacion y medio ambiente, pero tambe, si nos ta papia di IMF, bunita den termino di con e economia a desaroya durante e temponan aki na Aruba,” el a subraya.
El a indica cu esaki ta specialmente den relacion cu e recuperacion di e shock grandi y golpi duro cu Aruba a sufri pa motibo di e pandemia di COVID-19. El ehecutivo a resalta cu a pesar cu Aruba a pasa un tempo duro y a sufri un gran caida di actividad economico, e pais a recupera hopi bon. “Un recuperacion completo a tuma lugar. Mi ta hopi contento pa mira con e ta bay bon aki,” el a remarca.
Hilbers a indica cu dos punto cu e kier menciona. El a trece dilanti cu na e momentonan aki cos ta bayendo bon na Aruba u cu e crecemento economico ta bay bon, turistanan ta regresando Aruba y e actividad economico a bolbe, pero tin algun elemento cu e isla mester pone atencion na dje ariba termino largo.
E prome punto cu el a menciona ta e apoyo cu a wordo brinda na e pueblo y negoshinan durante e pandemia di COVID. El a splica cu como un resultado di esaki e debe a subi hopi y su pensamento ta cu ta importante pa Aruba cuminsa bay den e direccion pa reduci e porcentahe di debe gradualmente.
E ehecutivo di IMF a splica cu esaki ta posibel pasobra el a nota cu e deficit di finanzas di gobierno ta realmente un surplus. “Aruba ta resta placa den e presupuesto y por usa esaki pa baha e debe,” el a señala.
Hilbers a splica cu esaki ta hopi importante Aruba ta un isla cu tin un tamaño economico limita y esaki ta haci cu e isla ta hopi dependiente di e shocknan y posibel eventonan cu ta sucede na otro paisnan.
“E no tin su futuro completamente den su man. E mester por absorbe e shocknan. Pa absorbe eseynan, mi ta pensa cu un debe nacional mas abao ta importante. Y mi ta hopi contento cu tin trabao duro ta tuma lugar na e momentonan aki pa e minister di Finanzas, pa e otro ministernan, pa e Conseho di Minister, pa e gobierno,” el a agrega.
E di dos punto cu el a menciona ta uno cu no tin di haber realmente cu economia y esaki ta e desaroyo climatico. E director ehecutivo di IMF a indica cu esaki no ta un desaroyo cu ta specifico pa Aruba so, pero e ta un desaroyo mundial.
El a splica den e comision di IMF, den cual e ta representa Aruba, e topico di desaroyo climatico ta un tema di discusion importante na e momentonan aki. “Con nos ta bay trata cu e global warming? Ki medida nos por tuma y con nos por proteha nos mes contra e efectonan di esaki? Y esaki ta importante pa Aruba tambe, mi ta pensa,” Hilbers a menciona.
El a sigui splica cu e isla ta dependiente di turistanan y di otro fuentenan di entrada, y cambio di clima, el a remarca, lo tin un influencia riba esaki. El a señala cu e ta contento di tende cu esaki ta un tema cu Aruba ta trahando riba dje na e momentonan y cu tin un plan cu ta wordo desaroya ariba adaptacion na cambio di clima.
Hilbers a indica cu e plan pa adaptacion di cambio di clima ta inclui kico e pais por haci pa prepara pa un cambio di clima, con e por crea posibilidadnan economico tambe den e ambito di e cambio aki, entro otro.
“Pues mi ta hopi contento pa nota cu ta pensa bon riba esaki y cu ta traha duro riba esaki. Esaki ta importante,” el a subraya.
Pa loke ta e coleccion entre Aruba y e Fondo Monetario Internacional, Hilbers a bisa cu esaki ta bastante intensivo. El a indica cu dos biaha pa aña un delegacion di Aruba, dirigi pa e minister di Finanzas, y e actual presidente di Banco Central di Aruba, ta bay Washington pa participa den e reunionnan cu IMF tin, e reunion di primavera y asina yama reunion anual.
El a splica cu den e siman ey nan ta intercambia pensamentonan tocante e desaroyo economico na Aruba, pero tambe e desaroyonan economico internacional ta importante pa esaki. “Pues dos biaha pa aña tin un contacto intensivo. Ademas di esaki tin asesoramento completo y frecuentemente di e conseho di parti di IMF na e autoridadnan Arubiano tocante diferente tema di politica,” el a finalisa.
